सोनिया गांधी राजस्थानमधून राज्यसभेत जाऊ शकतात; तर रायबरेलीतून प्रियांका गांधी लोकसभा लढतील – सूत्र

 

नवी दिल्ली, लोकशाही न्यूज नेटवर्क;

 

राज्यसभा निवडणुकीसंदर्भात सर्वच पक्षांकडून उमेदवारांची नावे जाहीर केली जात आहेत. सूत्रांनी दिलेल्या माहितीनुसार, सोनिया गांधी राजस्थानमधून राज्यसभेची निवडणूक लढवू शकतात. सोनिया गांधी सध्या उत्तर प्रदेशातील रायबरेलीमधून खासदार आहेत. सूत्रांनी दिलेल्या माहितीनुसार, आता काँग्रेस नेत्या प्रियांका गांधी सोनिया गांधी यांच्या जागेवरून लोकसभा निवडणूक लढवू शकतात. विशेष म्हणजे राजस्थानमध्ये राज्यसभेच्या 3 जागांवर निवडणूक होणार आहे. भाजपच्या खात्यात 2 आणि काँग्रेसच्या खात्यात 1 जागा जाण्याची शक्यता आहे.

काँग्रेसला 10 जागा मिळण्याची शक्यता आहे

विविध राज्यांमध्ये होणाऱ्या राज्यसभेच्या या निवडणुकीत काँग्रेसला 10 जागा मिळू शकतात, हे विशेष. काँग्रेसला तेलंगणातून 2, कर्नाटकातून 3, राजस्थान, महाराष्ट्र, हिमाचल, झारखंड आणि बिहारमधून एक जागा मिळण्याची शक्यता आहे. राज्यसभेच्या 56 जागांसाठी 15 फेब्रुवारीपर्यंत अर्ज भरायचे आहेत आणि गरज पडल्यास 27 फेब्रुवारीला निवडणूक होणार आहे.

प्रियांका गांधी उत्तर प्रदेशात दीर्घकाळापासून सक्रिय आहेत

सोनिया गांधी राज्यसभेवर गेल्यानंतर प्रियंका गांधी रायबरेलीतून निवडणूक लढवण्याची शक्यता आहे. प्रियांका गांधी उत्तर प्रदेशात दीर्घकाळापासून सक्रिय आहेत. विधानसभा निवडणुकीपूर्वी त्यांनी यूपीमध्ये मेहनत घेतली होती. रायबरेलीत सोनिया गांधी यांच्या निवडणूक प्रक्रीया आणि कामकाजावर प्रियंका गांधीही लक्ष ठेवून होत्या, असे जाणकारांचे म्हणणे आहे.

सोनिया गांधी यांना मध्य प्रदेशातून उमेदवारी देण्याची मागणी करण्यात आली होती

काँग्रेसच्या मध्य प्रदेश काँग्रेस युनिटने पक्षाच्या माजी प्रमुख सोनिया गांधी यांना राज्यसभेत राज्याचे प्रतिनिधित्व करण्याचे आवाहन केले होते. राज्य युनिटचे अध्यक्ष जितू पटवारी यांनी सोमवारी सांगितले की ज्येष्ठ नेते कमलनाथ यांनी नुकतीच दिल्लीत सोनिया गांधी यांची भेट घेतली आणि त्यांना राज्य युनिटच्या मागणीवर विचार करण्याची विनंती केली. पटवारी यांनी एका निवेदनात म्हटले होते, “मध्य प्रदेश काँग्रेसला सोनियाजींनी राज्यसभेत राज्याचे प्रतिनिधित्व करावे अशी इच्छा आहे. या मागणीवर राज्यातील सर्व ज्येष्ठ नेते आणि आमदारांचे एकमत आहे. ते म्हणाले होते, ‘राज्यातील काँग्रेस पक्षाला वाटते की, यापूर्वी पंतप्रधानपद नाकारणाऱ्या सोनियाजी मध्य प्रदेशातून राज्यसभेवर गेल्या तर जनतेचा आवाज बळकट होईल.