सांगली, लोकशाही न्यूज नेटवर्क:
सांगलीतील जत येथे भररस्त्यात अज्ञात गुंडांनी नगरसेवकाची गाडी अडवून त्यांच्यावर गोळीबार करून त्यांची हत्या केल्याची खळबळजनक घटना घडली आहे. त्यांची ईनोव्हा गाडी अडवून अज्ञातांनी त्यांच्यावर गोळ्या झाडल्या. विजय ताड असे हत्या करण्यात आलेल्या नगरसेवकाचे नाव आहे. जत मधल्या सांगोला रोडवरील अल्फान्सो स्कूलजवळ ही घटना घडली. या घटनेमुळे जिल्ह्यात एकच खळबळ माजली आहे. घटनेची माहिती मिळताच जत पोलीस घटनास्थळी दाखल झाले असून, घटनेचा तपास करत आहेत.
विजय ताड हे जत येथील भाजपचे नगरसेवक आहेत. ताड हे शुक्रवारी दुपारी सांगोला रोडवरील अल्फान्सो स्कूलजवळ आपल्या इनोव्हा कारमध्ये होते. यावेळी अज्ञातांनी त्यांची कार अडवली. यानंतर आरोपींनी त्यांच्यावर गोळीबार केला. गोळीबारानंतर डोक्यात दगड घालून त्यांची हत्या केली. घटना उघड होताच परिसरात एकच गोंधळ उडाला.
नगरसेवक ताड हे आपल्या इनोव्हा गाडीतून सांगोला रोडवरील असणाऱ्या अल्फान्सो स्कूलमध्ये आपल्या मुलांना शाळेतून आणण्यासाठी निघाले होते. अल्फान्सो स्कूलच्या जवळ पोहोचले असता ताड यांचा पाठलाग करणाऱ्या अज्ञात हल्लेखोरांनी ताड यांची ईनोव्हा गाडी अडवली. त्यांच्या गाडीवर हल्ला करत ताड यांच्यावर थेट गोळ्या झाडल्या. त्यानंतर ताड हे गाडीतून खाली उतरताच हल्लेखोरांनी त्यांच्या डोक्यात दगड घातला. यामध्ये ते जागीच ठार झाले आहेत. या घटनेची माहिती मिळताच जत पोलिसांनी घटनास्थळी तातडीने धाव घेतली आहे. तसेच ताड समर्थकांनी या ठिकाणी मोठी गर्दी केली आहे. घटनेचे गांभीर्य ओळखून सांगलीचे पोलीस अधीक्षक बसवराज तेली देखील जतकडे रवाना झाले आहेत. या घटनेमुळे जत शहरासह जिल्ह्यामध्ये एकच खळबळ उडाली आहे. मात्र हा हल्ला नेमका कोणत्या कारणातून आणि कोणी केला आहे हे मात्र समजू शकले नाही.
