संतप्त शेतकऱ्यांकडून अजित पवारांच्या ताफ्यावर कांदे, टोमॅटोचा वर्षाव…

 

नाशिक, लोकशाही न्यूज नेटवर्क:

 

उपमुख्यमंत्री अजित पवार यांना शनिवारी शेकडो शेतकऱ्यांच्या रोषाला सामोरे जावे लागले. या शेतकऱ्यांनी पहाटे ओझर विमानतळावरून दिंडोरीकडे जाणाऱ्या अजित पवार यांच्या गाडीवर आणि त्यांच्या ताफ्यावर कांदे आणि टोमॅटोचा वर्षाव केला. कांदे आणि टोमॅटोला रास्त भाव मिळत नसल्याने संतप्त झालेल्या या शेतकऱ्यांनी आपल्या समस्यांकडे लक्ष वेधण्यासाठी ही पद्धत अवलंबली. यावेळी शेतकऱ्यांनी उपमुख्यमंत्र्यांच्या ताफ्यालाही रोखले होते. मात्र, काही वेळानंतर पोलिसांनी आंदोलकांना तेथून पळवून लावले.

नाराजी व्यक्त करण्यासाठी शेतकऱ्यांनी घोषणाबाजी करत उपमुख्यमंत्र्यांच्या ताफ्याला काळे झेंडे दाखवले. कांद्यावरील निर्यात शुल्क मागे घेण्याची आणि टोमॅटोला योग्य आधारभूत किंमत देण्याची मागणी शेतकऱ्यांनी केली. आंदोलकांमधील एका शेतकऱ्याने सांगितले की, ‘आम्ही सरकारच्या धोरणांचा निषेध करतो, शेतकरी मरत आहेत, आम्हाला कांद्यावरील निर्यात शुल्क मागे घ्यायचे आहे आणि टोमॅटोला योग्य किमान आधारभूत किंमत हवी आहे.’ दरम्यान कळवण येथून मोठा पोलिस बंदोबस्त तैनात करण्यात आला होता. पथकाने घटनास्थळी पोहोचून आंदोलकांना पांगवले.

मे-ऑगस्ट दरम्यान टोमॅटोचे भाव २०० रुपयांच्या वर पोहोचले होते. या महिन्यांत टोमॅटो सर्वसामान्यांच्या आवाक्याबाहेर गेला होता. आज परिस्थिती अशी आहे की टोमॅटोचा किरकोळ भाव 12 ते 18 रुपये प्रतिकिलो आहे. त्याचप्रमाणे नाशिकमधील घाऊक कांदा व्यापाऱ्यांनी निर्यात शुल्क हटवण्याच्या मागणीसाठी १३ दिवसांचा संप केला होता. सरकारच्या आश्वासनानंतर 3 ऑक्टोबरला संप मागे घेण्यात आला होता, मात्र घाऊक व्यापाऱ्यांनी कारवाईसाठी अधिकाऱ्यांना एक महिन्याचा अल्टिमेटम दिला आहे, अन्यथा पुन्हा संप करणार आहे.