कर्नाटक, लोकशाही न्यूज नेटवर्क;
कर्नाटकातील बेंगळुरूमध्ये एक धक्कादायक घटना समोर आली आहे. येथे एका पोलीस कॉन्स्टेबलला त्याच्या मैत्रिणीने पेटवून दिले. जखमी पोलिसाचा रुग्णालयात मृत्यू झाल्याचे पोलिसांनी गुरुवारी सांगितले. संजय असे मृताचे नाव असून राणी या होमगार्डसोबत त्याचे नाते होते. दोघेही बेंगळुरू येथील बसवानगुडी पोलीस ठाण्यात कार्यरत होते.
संजय त्याच्या मैत्रिणीला समजवायला गेला होता
अलीकडे राणी संजयपासून दूर राहू लागली होती. संजयने तिला दुसऱ्या व्यक्तीशी चॅट आणि फोन करताना पाहिले. बुधवारी संजय राणीची समजूत घालण्यासाठी गेला असता दोघांमध्ये जोरदार वादावादी झाली. तिने समेट करण्यास नकार दिल्यास स्वत:ला पेटवून घेण्याची धमकी संजयने हातात पेट्रोल घेऊन दिली. त्यानंतर स्वत:वरही पेट्रोल ओतून घेतले. त्याचवेळी राणीने माचिसची काडी पेटवली आणि त्याला जाळून टाकले. नंतर परिस्थिती गंभीर होत असल्याचे पाहून राणीने पाणी टाकून आग विझवण्याचा प्रयत्न केला आणि संजयला दुचाकीवरून व्हिक्टोरिया रुग्णालयात नेले. मात्र गुरुवारी पहाटे संजयचा मृत्यू झाला.
संजयच्या कुटुंबीयांचे म्हणणे आहे की राणीने त्याला जाणूनबुजून आग लावली, परिणामी त्याचा मृत्यू झाला. पोलिसांनी दिलेल्या माहितीनुसार, स्वतःचे कुटुंब असूनही संजयचे राणीसोबत संबंध होते. या घटनेप्रकरणी पुत्तेनहल्ली पोलिसांनी गुन्हा दाखल करून तपास सुरू केला आहे.