मोदींची सोमवारी पुण्यात जाहीर सभा

पुणे, लोकशाही न्युज नेटवर्क 

पंतप्रधान नरेंद्र मोदी यांची जाहीर प्रचार सभा रेसकोर्स मैदानावर येत्या सोमवारी 29 एप्रिल रोजी सायंकाळी होणार आहे. पोलिसांकडून या सभास्थळी सुरक्षिततेचा आढावा घेण्यात आला आहे. यापूर्वी दिवंगत पंतप्रधान पंडित जवाहरलाल नेहरू आणि इंदिरा गांधी (1972) यांच्या सभा झाली होती. त्यानंतर तिसऱ्या पंतप्रधानांची सभा साडेचार दशकानंतर येथे होत आहे.

पंतप्रधान मोदी यांची सभा स. प. महाविद्यालयाच्या मैदानावर अपेक्षित होती. पुणे, मावळ, शिरूर आणि बारामती या चारही लोकसभा मतदारसंघांसाठी ही सभा होणार असल्याने सभेला मोठ्या प्रमाणात गर्दी अपेक्षित आहे. या चारही मतदारसंघातील कार्यकर्त्यांना सभा स्थानी पोहोचता यावे, यासाठी सर्वांना सोयीस्कर ठिकाण असावे, यासाठी रेसकोर्स मैदानाचा पर्याय निश्चित करण्यात आला आहे.

सभेचे स्थान निश्चित झाल्यानंतर पोलिसांकडून तसेच ‘एसपीजी’कडून सुरक्षिततेचा आढावा घेण्यात आला आहे. मोदी हे सायंकाळी सहा ते साडेसहापर्यंत सभास्थानी पोहोचतील, असे अपेक्षित आहे. लोहगाव विमानतळावरून मोदी सभास्थानी येणार आहे. सभा संपल्यानंतर ते सोमवारी पुण्यात मुक्कामी राहणार आहेत. राजभवन येथे त्यांचा मुक्काम असणार आहे. त्यानंतर मंगळवारी ते पश्चिम महाराष्ट्रात तीन सभा घेणार आहेत.

रेसकोर्स मैदान आणि सभा

रेसकोर्स मैदानावर दिवंगत पंतप्रधान पंडित जवाहरलाल नेहरू तसेच इंदिरा गांधी यांच्या सभा झाल्या होत्या. त्यानंतर पंतप्रधान म्हणून मोदी यांची सभा येत्या सोमवारी होत आहे. राष्ट्रवादी काँग्रेसकडून काही वर्षांपूर्वी या मैदानावर ज्येष्ठ नेते शरद पवार यांच्या सत्काराचा कार्यक्रम आयोजित केला होता. पंडित जवाहरलाल नेहरू आणि इंदिरा गांधी यांची सभा रेसकोर्स मैदानवर झाली आहे. गांधी यांची 1972 साली झालेल्या सभेच्यावेळी आपण व्यासपीठावर उपस्थित होतो. बांगलादेशाची स्थापना झाल्यानंतर देशभर दौरा केला होता. त्यावेळी ही सभा झाली होती. या सभेसाठी ग. दि. माडगूळकरांनी ‘आज सैनिकापुढे प्रगटली विजयी रणदेवता’ हे गीत रचले होते. हे गीत सुरू असताना इंदिरा गांधी त्याचा अर्थ दिवंगत माजी मुख्यमंत्री यशवंतराव चव्हाण यांना विचारला होता. त्यावेळी चव्हाणांनी आपल्याला बोलावून घेत इंदिरा गांधी यांना त्या गीताचा अर्थ सांगण्यास सांगितल्याची आठवण माजी आमदार उल्हास पवार यांनी सांगितली.

पंतप्रधान नरेंद्र मोदींच्या सभेची तयारी सुरू करण्यात आली आहे. मैदानाची भव्यता बघता किमान दोन लाख नागरिक या सभेसाठी येतील, असे अपेक्षित आहे. पुणे, बारामती, शिरूर आणि मावळ या चारही मतदारसंघातील नागरिक मोंदीना ऐकण्यासाठी येणार आहेत. त्यादृष्टीने योग्य ती काळजी घेण्यात येत आहे.

– राजेश पांडे, प्रदेश उपाध्यक्ष, भाजप.