मोहराळा येथे डॉ. बाबासाहेब आंबेडकरांच्या पुतळ्याची विटंबणा; अज्ञातावर गुन्हा दाखल, गावात तणाव पुर्ण शांतता…
यावल, लोकशाही न्यूज नेटवर्क;
तालुक्यातील मोहराळा येथे बाबासाहेब आंबेडकरांच्या पुतळ्याची विटंबना झाल्याची घटना घडली असून, या प्रकरणी यावल पोलीस ठाण्यात गुन्हा दाखल करण्यात आला आहे. घटनेनंतर गावातील बसस्टॅन्ड चौकात पोलीस बंदोबस्त तावण्यात आला आहे .
याबाबत सविस्तर वृत्त असे की, यावल तालुक्यातील मोहराळा येथे काल रात्री शॉर्ट सर्कीट मुळे वीज खंडित होती. आज सायंकाळी दुरुस्तीनंतर वीज पुरवठा पूर्ववत करण्यात आला. त्यात आज दिवसभर पाऊस असल्याने कुणाचे पुतळ्याकडे लक्ष गेले नाही. दरम्यान, सायंकाळी अनिल अडकमोल हे पुतळ्याजवळचे सीसीटिव्ही कॅमेरे सुरू आहे की नाही ? हे पाहण्यासाठी गेले असता, त्यांना कुणी तरी अज्ञात समाजकंटकाने पुतळ्याच्या दिशेने दगड भिरकावल्याचे दिसून आले. यामुळे पुतळ्याला दोन ठिकाणी खड्डे पडल्याचे दिसून आले. ही माहिती मिळताच समाजबांधवांनी अतिशय आक्रमक पवित्रा घेतला. या घटनेची माहिती मिळताच पोलीस कर्मचारी मोहराळा येथे दाखल झाले. तर, समाजबांधवांनी यावल पोलीस स्थानकात धडक देऊन या प्रकरणी कठोर कारवाईची मागणी केली.
या संदर्भात यावल पोलीस स्थानकात अनिल केशव अडकमोल (५२) यांच्या फिर्यादीवरून अज्ञात माथेफिरू विरोधात गुन्हा दाखल करण्यात आला आहे. सध्या गावातील वातावरण नियंत्रणात असल्याची माहिती सूत्रांनी दिली आहे. डीवायएसपी कुणाल सोनवणे व पोलीस निरिक्षक राकेश मानेगावकर यांनी मोहराळा येथे भेट देऊन शांततेचे आवाहन केले आहे. आज सकाळी निळे निशान या सामाजीक संघटनेचे आनंद बाविस्कर यांनी मोहराळा गावाला भेट दिली व सर्व समाज बांधवांना कोणताही कायद्या हातात न घेता शांततेच्या मार्गाने न्याय मिळवण्याबद्दल मार्गदर्शन व सुचना दिल्यात, यावेळी मोहराळा ग्रामपंचायतच्या कार्यालयात झालेल्या बैठकीत मोठया संख्येत समाजबांधव उपस्थित होते. दरम्यान आनंद बाविस्कर यांच्या सोबत निळे निशान संघटनेचे तालुका अध्यक्ष विलास तायडे, युवकचे सतिष अडकमोल यांच्यासह संघटनेचे पदाधिकारी उपस्थित होते.