आंतरराष्ट्रीय, लोकशाही न्यूज नेटवर्क:
24 फेब्रुवारी 2022 पासून रशिया आणि युक्रेनमध्ये युद्ध सुरू आहे. दरम्यान, युक्रेनने राष्ट्राध्यक्ष व्लादिमीर पुतिन यांच्या हत्येचा प्रयत्न केल्याचा दावा रशियाने केला आहे. क्रेमलिन, रशियाच्या अध्यक्षीय कार्यालयाने असा दावा केला आहे की युक्रेनने बुधवारी रात्री क्रेमलिनवर ड्रोन हल्ला केला, ज्याचा उद्देश राष्ट्राध्यक्ष पुतिन यांना ठार मारण्याचा होता. युक्रेनने दोन ड्रोन हल्ल्यांद्वारे क्रेमलिनला लक्ष्य करण्याचा प्रयत्न केल्याचे रशियन अधिकाऱ्यांचे म्हणणे आहे. दोन्ही ड्रोन पाडण्यात आले आहेत.
Reportedly, this is the moment when a drone hit the Kremlin. pic.twitter.com/MiUob8fSV9
— Anton Gerashchenko (@Gerashchenko_en) May 3, 2023
बुधवारी रशियन सोशल मीडियावर फिरत असलेल्या एका व्हिडिओमध्ये मॉस्कोमधील क्रेमलिनच्या वर धुराचे लोट उठताना दिसत आहेत. यानंतर अध्यक्षीय प्रशासनाने सांगितले की हा व्लादिमीर पुतिन यांच्यासाठी युक्रेनचा ड्रोन हल्ला होता. रशियाच्या राष्ट्राध्यक्ष कार्यालयाच्या क्रेमलिनचे प्रवक्ते दिमित्री पेस्कोव्ह यांनी सांगितले की, ड्रोन हल्ल्याच्या वेळी राष्ट्राध्यक्ष पुतीन क्रेमलिनमध्ये उपस्थित नव्हते.
मॉस्कोच्या रहिवाशांनी स्थानिक वेळेनुसार दुपारी 2:00 नंतर लगेचच क्रेमलिनच्या भिंतींच्या मागे स्फोट ऐकले. एका स्थानिक टेलिग्राम चॅनलने स्थानिक रहिवाशांचे रेकॉर्ड केलेले व्हिडिओ फुटेज देखील शेअर केले आहेत. मात्र, या हल्ल्यात युक्रेनचा सहभाग असल्याची स्वतंत्रपणे पुष्टी होऊ शकली नाही.
क्रेमलिनने या घटनेला नियोजित दहशतवादी हल्ला आणि रशियाच्या राष्ट्राध्यक्षांच्या हत्येचा प्रयत्न म्हटले आहे. रशियन न्यूज एजन्सी टासच्या म्हणण्यानुसार, क्रेमलिनने धमकी दिली आहे की रशियाला योग्य वाटेल तेव्हा आणि कुठे बदला घेण्याचा अधिकार आहे.
या ड्रोन हल्ल्याचा पुतिन यांच्या कामावर कोणताही परिणाम झाला नसल्याचे क्रेमलिनने सांगितले आहे. पूर्वनियोजित वेळ आणि नियोजनानुसार त्यांनी आपले काम सुरू ठेवले. रशियन न्यूज एजन्सी टासने दिलेल्या माहितीनुसार, क्रेमलिनने सांगितले की या घटनेनंतरही 9 मेची विजय दिन परेड होईल.