जळगाव , लोकशाही न्यूज नेटवर्क
खान्देश कामगार उत्कर्ष संघटनेचे अध्यक्ष व माजी महापौर ललित कोल्हे व त्यांच्यासह पाच ते सहा जणांनी रेमंड कंपनी परिसरात औद्योगिक न्यायालयाचे आदेश असतानाही गर्दी जमवून न्यायालयाच्या आदेशाचे उल्लंघन केल्याप्रकरणी मंगळवारी रात्री ११.३० वाजता एमआयडीसी पोलिस ठाण्यात गुन्हा दाखल करण्यात आला आहे.
रेमंड कंपनीमधील काही कामगारांनी वेतनवाढ मान्य नसल्यामुळे संप पुकारला आहे. त्यामुळे कंपनीचे कामकाज २४ तारखेपासून बंद असून कंपनीच्या ५० मीटरच्या आवारात कुणीही गर्दी करू नये असे औद्योगिक न्यायालयाचे आदेश असतानाही खान्देश कामगार उत्कर्ष संघटनेचे अध्यक्ष व माजी महापौर ललित कोल्हे व त्यांच्यासह पाच ते सहा जणांनी गर्दी जमवून न्यायालयाच्या आदेशाचे उल्लंघन केल्याप्रकरणी मंगळवारी रात्री ११.३० वाजता एमआयडीसी पोलिस ठाण्यात गुन्हा दाखल करण्यात आला आहे. कंपनीचे प्रभारी मुख्य प्रबंधक प्रफुल्ल दत्तात्रय गोडसे यांनी फिर्याद दिली आहे.
फिर्यादीनुसार, ललित कोल्हे व पाच ते सहा जण मंगळवारी दुपारी १ वाजता रेमंड कंपनीच्या ५० मीटरच्या आत येवून कामबंद आंदोलनाबाबत प्रसारमाध्यमांना माहिती देत होते, यासंदर्भात गैरकायद्याची सिक्युरिटी इन्चार्ज गिरधारी कुर्वे यांनी गोडसे यांना कळविले. त्यानंतर कुर्वे यांनी कोल्हे यांना समजावून सांगून कंपनीच्या ५० मीटर बाहेर जाण्यास सांगितले. त्यावर आपण कुठलेही आंदोलन करत नसल्याचे सांगत कोल्हे व इतर लोक ५० मीटरच्या आतच थांबून राहिले. हा प्रकार कुर्वे यांनी गोडसे यांना कळविला. त्यानंतर रात्री गोडसे यांनी एमआयडीसी पोलिस ठाण्यात तक्रार दिली. त्यानुसार न्यायालयाचे आदेशाचे उल्लंघन करून मंडळी जमविल्याप्रकरणी कोल्हेंसह पाच ते सहा जणांविरूध्द गुन्हा दाखल करण्यात आला आहे.