ऐनपुर, लोकशाही न्यूज नेटवर्क:
तालुक्यातील अजंदे येथील मुळ रहिवाशी बबन भाऊराव पाटील (३५) यांचा मोटर सायकल अपघात होऊन दुर्दैवी मृत्यू झाल्याची घटना घडली आहे. यावेळी रस्त्याबाबत परिसरातील नागरिकांनी निवेदन दिले आहे.
याबाबत सविस्तर वृत्त असे की, बबन पाटील हे धमोडी वरून कांडवेल कडे जात असतांना एसटी महामंडळाची बस आणि मोटारसायकलचा अपघात होऊन झालेल्या अपघातात दुर्दैवी मृत्यू झाल्याने अजंदे गावावर शोककळा पसरली आहे. या अपघाताच्या घटनेची माहिती मिळताच रावेर तालुक्यातील कृषी केंद्र संचालक, मित्रमंडळी व नातेवाईकांनी रावेर येथील ग्रामीण रुग्णालयात मोठी गर्दी केली होती. शवविच्छेदन करण्यासाठी रावेर येथील ग्रामीण रुग्णालयात मृतदेह आणला असता, नातेवाईकांनी आक्रोश केला. बबन पाटील यांचा अपघातात मृत्यु झाल्याने सर्वत्र हळहळ व्यक्त केली जात आहे. मयत बबन पाटील यांच्या पश्चात पत्नी, दोन अपत्य, आई व बहीण असा परिवार आहे. निंभोरा पोलीस स्टेशनला अकस्मात मृत्यूची नोंद करण्यात आली आहे. पुढील तपास सहाय्यक पोलीस निरीक्षक गणेश धुमाळ यांच्या मार्गदर्शनाखाली पोलिस करीत आहेत.
