यावल, लोकशाही न्यूज नेटवर्क:
आपल्या एका वर्षाच्या मुलाला भेटण्याची इच्छा मित्राला बोलून दाखवत तरूणाने विहिरीत उडी घेवून आपली जीवनयात्रा संपविल्याची दुदैवी घटना घडली आहे. याप्रकरणी यावल पोलीस ठाण्यात अकस्मात मृत्यूची नोंद करण्यात आली आहे. आवेश दगडू तडवी (३०) रा. बिडगाव मोहरद ता.चोपडा ह.मु.यावल असे मृत तरूणाचे नाव आहे.
याबाबत अधिक माहिती अशी की, आवेश तडवी हा आपल्या पत्नी व एक वर्षाच्या मुलासह वास्तव्याला होता. बुधवारी १५ फेब्रुवारी रोजी सकाळी ११ वाजता घरात कुणाला काहीही न सांगता यावल सातोद रस्त्यावर असलेल्या शेतातील विहिरीत त्याने उडी घेवून आत्महत्या केली. आत्महत्या करण्यापुर्वी त्याने त्याचा मित्राला फोन करून मला माझ्या लहान मुलाला भेटण्याची इच्छा आहे, असे सांगितले होते. विहिरीजवळ मयताची दुचाकी आणि चप्पल आढळून आले. त्यानुसार विहिरीत उडी घेवून आत्महत्या केल्याचे समोर आले. घटनेबद्दल गावात कळताच गावातील ग्रामस्थांनी घटनास्थळी धाव घेतली होती. आत्महत्या का केली हे मात्र अद्याप स्पष्ठ होवु शकले नाही.
