जळगाव, लोकशाही न्यूज नेटवर्क
बनावट दस्तवेजच्या आरोपाखाली विजय भास्कर पाटील (रा. दीक्षित वाडी जळगाव ) यांच्यावर गुन्हा दाखल करण्यात आलाय. जळगाव जिल्हा मराठा विद्या प्रसारक सहकारी समाज मर्यादीत जळगाव या शैक्षणिक संस्थेत अध्यक्ष किंवा संचालक नसतांना देखील या संस्थेच्या संचालक मंडळाच्या अधिकारात हस्तक्षेप करण्याच्या उद्देशाने तसेच संस्थेचा अध्यक्ष असल्याचे भासवून संस्थेच्या लेटरहेडवर खोट्या व बनावट मजकुराचे अर्ज करुन, सह्या करुन दस्तावेज तयार केल्याच्या आरोपाखाली जिल्हापेठ पोलिस स्टेशनला गुन्हा दाखल झाला आहे. नीलेश रणजीत भोईटे (रा. भोईटे नगर जळगाव) यांनी फिर्याद दिली आहे.
सदर दस्तावेज बनावट असतांना ते खरे भासवून कवयित्री बहिणाबाई चौधरी उत्तर महाराष्ट्र विद्यापिठाच्या कार्यालयात सादर केला असल्याचे म्हटले आहे. याप्रकरणी जिल्हापेठ पोलिस स्टेशनला गु.र.न. 431/23 भा.द.वि. 465, 471 नुसार गुन्हा दाखल करण्यात आला असून पुढील तपास स.पो.नि. मिरा देशमुख करत आहेत.
