डोक्यात दांडा मारून एकाचा खून, आरोपी अटकेत

वरणगाव, लोकशाही न्यूज नेटवर्क 

दर्यापूर शिवारातील गणेशनगरमधील एका वडापावच्या दुकानावर किरकोळ कारणावरून आयुध निर्माणीच्या कर्मचार्‍याने जि. प. पाणी पुरवठा कर्माचाऱ्याच्या डोक्यात, मानेवर लाकडी दांडयाने मारहाण करून खुन केल्याची घटना दि. १४ रविवार रोजी सकाळी पावणे दहा वाजेच्या सुमारास घडली.

वरणगाव शहरातील शिवाजीनगरमधील रहिवाशी प्रमोद ज्ञानेश्वर महाराज (वय ५५) हे रविवारच्या सकाळी दर्यापुर शिवारातील गणेशनगरमधील एका वडापावच्या दुकानासमोर खुर्च्या अस्ताव्यस्त करीत होते, त्यावेळी दिपक कृष्णाकुमार सिंग तेथे येऊन खुर्च्या का फेकत आहे असा जाब विचारताच त्या दोघात शाब्दिक बाचाबाची झाली.

यावेळी तिथे उपस्थित असणाऱ्यांनी त्यांच्यात मध्यस्थी करून भांडण मिटवित तेथुन निघुन गेले. मात्र थोड्याच वेळाने दिपक सिंग घरी जाऊन लाकडी दांडा घेऊन आला व पुन्हा प्रमोद महाजन त्याच वडापावच्या दुकानात वडापाव खात असताना पाठी मागुन येऊन दिपक याने हातातील लाकडी दांड्याने प्रमोदला डोकावर, मानेवर  व पाठीवर जबर बेशुद्ध होईपर्यत मारहाण करून तेथुन निघुन गेला. तर प्रमोद खुर्चीतच बेशुद्ध अवस्थेत असतना मनोहर ओंकार महाजन  (प्रमोदचे चुलत भाऊ) हे घटना स्थाळावर आले व प्रमोदला उपचारासाठी खासगी रुग्णालयात दाखल केले. मात्र डॉक्टरानी त्यांना तपासाअंती मृत घोषीत केले.

मारहाण केल्यानतंर दिपक सिंग हा घटनास्थळावरून पसार झाला होता. मात्र या घटनेची माहिती मिळताच वरणगाव पोलीस स्टेशनचे सह पोलीस निरिक्षक आशिष आडसुळ, उप निरिक्षक परशुराम दळवी, उप निरिक्षक इस्माईल शेख, पो. हे. कॉ. नागेंद्र तायडे,  कॉ. विजय बाविस्कर, कॉ. योगेश पाटील यांनी घटना स्थळाकडे धाव घेऊन पसार झालेला दिपक याला मोठ्या शिताफीने ताब्यात घेतले.

याबाबत वरणगाव पोलीस स्टेशनला मनोहर ओंकार महाजन यांच्या फिर्यादीवरून आयुध निर्माणी कर्मचारी दिपक कृष्णा कुमार सिंग यांच्या विरोधात भा द वी कलम ३०२ प्रमाणे खुनाचा गुन्हा दाखल करण्यात आला असून घटनेचा तपास उपविभागीय पोलीस अधिक्षक राजकुमार शिंदे यांच्या मार्गर्शनाखाली सह पो निरिक्षक आशिष आडसुळ हे करीत आहे.