नवी दिल्ली ;- जागतिक क्रिकेटमध्ये हिटमॅन म्हणून आपला ठसा उमटवणाऱ्या कर्णधार रोहित शर्मावर भारतीय क्रिकेट चाहत्यांच्या नजरा खिळल्या आहेत. रोहित विश्वविक्रम आपल्या नावावर करण्याच्या मार्गावर उभा आहे.
अफगाणिस्तानविरुद्ध खेळल्या जाणाऱ्या सामन्यात रोहित शर्मा वेस्ट इंडिजचा फलंदाज ख्रिस गेलचा विश्वविक्रम मोडू शकतो. आंतरराष्ट्रीय क्रिकेटमध्ये सर्वाधिक षटकार मारणारा फलंदाज होण्यापासून तो फक्त 3 पावले दूर आहे. आंतरराष्ट्रीय क्रिकेटमध्ये सर्वाधिक षटकार मारण्याच्या बाबतीत ख्रिस गेल अव्वल स्थानावर आहे. गेलने आतापर्यंत 483 सामन्यांमध्ये (तीन्ही फॉरमॅटसह) 553 षटकार मारले आहेत. या यादीत रोहित 551 षटकारांसह दुसऱ्या स्थानावर आहे. अशा स्थितीत अफगाणिस्तानविरुद्ध तीन षटकार मारल्यास तो गेलचा विक्रम मोडू शकतो.
आंतरराष्ट्रीय क्रिकेटमध्ये सर्वाधिक षटकार मारणारे फलंदाज
ख्रिस गेल (वेस्ट इंडिज) – 553 षटकार
रोहित शर्मा (भारत) – 551 षटकार
शाहिद आफ्रिदी (पाकिस्तान) – 476 षटकार
ब्रेंडन मॅक्क्युलम (न्यूझीलंड) – 398 षटकार
मार्टिन गुप्टिल (न्यूझीलंड) – 383 षटकार
आंतरराष्ट्रीय T20 मध्ये सर्वाधिक षटकार मारणारा फलंदाज
रोहित शर्मा हा ती-20 आंतरराष्ट्रीय क्रिकेटमध्ये सर्वाधिक षटकार ठोकणारा फलंदाज आहे. रोहितच्या नावावर 148 टी-20 आंतरराष्ट्रीय सामन्यांमध्ये 182 षटकार आहेत. या यादीत किवीचा सलामीवीर मार्टिन गप्टिल 173 षटकारांसह दुसऱ्या स्थानावर तर गेल 125 षटकारांसह तिसऱ्या स्थानावर आहे. तिन्ही फॉरमॅटमध्ये मिळून सर्वाधिक षटकार मारण्याच्या विक्रमावर आता रोहितची नजर आहे.
