नवी दिल्ली, लोकशाही न्यूज नेटवर्क
आजकाल आपण सर्वच गोष्टी ऑनलाईन (Online) मागवत असतो. वस्तूंपासून ते खाण्याच्या पदार्थांपर्यंत.. तसेच आपण ऐकलही असेल की बऱ्याचदा ऑनलाईन मागवलेल्या वस्तू खराब किंवा दुसरीच वस्तू पाठवली जाते. अशीच एक घटना उघडकीस आलीय. एका व्यक्तीने ऑनलाईन पद्धतीने लॅपटॉप (Laptop) मागवला आणि चक्क कपडे धुण्याचे साबण आले. तसेच याविषयी संबंधित कंपनीला जाब विचारला तर धक्कादायक उत्तर मिळालं.
कारवाई करण्यास नकार
एका व्यक्तीला ई-कॉमर्स वेबसाइट (E-commerce website) फ्लिपकार्टवरून (Flipkart) आपल्या वडिलांसाठी लॅपटॉप ऑर्डर केल्यानंतर त्या ऐवजी जे पार्सल आले त्यामुळे त्याला मोठा धक्काच बसला. यानंतर जेव्हा त्या व्यक्तीने कंपनीकडे तक्रार केली तेव्हा त्याला आणखी एक धक्का बसला, त्याला ‘नो रिटर्न पॉलिसी’चे कारण देत कोणतीही कारवाई करण्यास नकार देण्यात आला.
नेमकं प्रकरण काय ?
यशस्वी शर्मा हे आयआयएम अहमदाबादचे विद्यार्थी आहे. त्यांनी फ्लिपकार्ट वर सुरू असलेल्या बिग-बिलियन डे सेलवर आपल्या वडिलांसाठी लॅपटॉप ऑर्डर केला. मात्र, जेव्हा त्यांच्या वडिलांनी डिलिव्हरी बॉयकडून ऑर्डर घेतल्यानंतर पॅकेट उघडले तर त्यामध्ये कपडे धुण्याचा साबून आला होता. यानंतर यशस्वी यांनी लिंक्डइनवर एका लांबलचक पोस्ट टाकली. त्यात त्यांनी त्यांच्यासोबतची घटना शेअर केली आहे.
लॅपटॉपऐवजी साबणाचा बॉक्स
त्यानी लिहिले की, मी फ्लिपकार्टवरून वडिलांसाठी लॅपटॉप ऑर्डर केले होते. मात्र, वडिलांनी बॉक्स उघडला तेव्हा लॅपटॉपऐवजी साबणाचा बॉक्स सापडला. याबाबत त्यांनी फ्लिपकार्ट कस्टमर केअरकडे तक्रार केली असता त्यांनी आपली चूक मान्य करण्यास नकार दिला. यशस्वीने त्‍यांना डिलिव्‍हरीचे सीसीटीव्‍ही फुटेज असल्‍याचे सांगितले असल्याचेही सांगितले तरी कंपनीने ‘नो रिटर्न पॉलिसी’चे कारण देत यशस्वी यांना नकार दिला. डिलिव्हरी बॉयसमोर बॉक्स उघडायला हवा होता, ही चूक पीडित यशस्वीने मान्य केली आहे.
‘ओपन बॉक्स डिलिव्हरी’
दरम्यान ते पुढे म्हणाले की, माझ्या वडिलांना फ्लिपकार्टच्या ‘ओपन बॉक्स डिलिव्हरी’ याबाबत माहिती दिली नव्हती. पण ओटीपी घेताना डिलिव्हरी बॉयने हे सांगायला हवे होते. वडिलांना न कळवता तो ओटीपी देऊन निघून गेला. तो गेल्यानंतर वडिलांनी पॅकेज उघडले तेव्हा त्यात लॅपटॉपऐवजी कपडे धुण्याचा साबण निघाला.
सोशल मीडियावर जोरदार व्हायरल
ग्राहकाने ही बाब सोशल मीडियाच्या माध्यमातून मांडली आहे. त्यांनी फ्लिपकार्टचे सीईओ कल्याण कृष्णमूर्ती आणि केंद्रीय मंत्री पियुष गोयल यांनाही त्यांच्या पोस्टमध्ये टॅग केले आहे. हे प्रकरण सोशल मीडियावर जोरदार व्हायरल होत आहे.
