लखनौ ;- राज्याच्या माजी मुख्यमंत्री आणि बहुजन समाज पक्ष प्रमुख मायावती यांनी मोठी घोषणा करत इंडिया आघाडीशी युती होणार नसल्याची माहिती दिली आहे. मायावती यांच्या या घोषणेनंतर राजकीय वर्तुळात अनेक चर्चांना उधाण आले आहे.
बसपा देशात लोकसभेची सार्वत्रिक निवडणूक आपल्या स्वतःच्या जीवावरच दमदारपणे लढवण्याच्या तयारीत आहे. त्यामुळं आम्ही कोणाशी युती-आघाडी किंवा तिसरी आघाडी करण्याच्या चर्चा या केवळ अफवा आहेत. ही चुकीची बातमी आहे. माध्यमांनी अशा प्रकारे खोडसाळ बातम्या देऊन आपली विश्वासार्हता गमावू नये, लोकांनी देखील सावध राहायला हवं. उत्तर प्रदेशात बसपा खूपच मजबुतीनं एकट्यानं लोकसभा निवडणूक लढवणार असल्यानं विरोधी लोक खूपच बैचेन झाले आहेत. त्यामुळं प्रत्येक दिवशी ते विविध प्रकारच्या अफवा पसरवून लोकांची दिशाभूल करण्याचं काम करत आहेत असे मायावती म्हणाल्या.