मोठी बातमी; गुरुवारी किंवा शुक्रवारी जाहीर होऊ शकतात लोकसभा निवडणुकीच्या तारखा – सूत्र…

 

नवी दिल्ली, लोकशाही न्यूज नेटवर्क;

 

निवडणूक आयोग सोमवार ते बुधवार या कालावधीत जम्मू-काश्मीरचा दौरा करणार आहे. केंद्रशासित प्रदेशात कधी निवडणुका होऊ शकतात, याचा आढावा घेण्यासाठी ही भेट होत आहे. या भेटीनंतर लवकरच लोकसभा निवडणुकीच्या तारखा जाहीर होण्याची शक्यता सूत्रांनी व्यक्त केली आहे. गुरुवारी किंवा शुक्रवारी निवडणुकीची घोषणा होऊ शकते.

केंद्रशासित प्रदेशात (UT) विधानसभा निवडणुका सप्टेंबरपर्यंत घेण्याचे निर्देश सर्वोच्च न्यायालयाने दिले आहेत. या सूचनेनुसार निवडणूक आयोग जम्मू-काश्मीरचा दौरा करणार आहे. जम्मू-काश्मीरमध्ये लोकसभा निवडणुकांसोबत विधानसभा निवडणुका घेता येतील का, याचे मूल्यमापन करण्यासाठी केंद्राने पॅनेलला सांगितले होते.

एका सूत्राने सांगितले की, “मुल्यांकन पूर्ण झाल्यानंतर आणि बुधवारी दौरा संपल्यानंतर आयोग गुरुवारी किंवा शुक्रवारी लोकसभा निवडणुकीच्या तारखा जाहीर करू शकेल.”

लोकसभा निवडणुकीची घोषणा होताच आदर्श आचारसंहिता लागू होणार आहे. त्यामुळे घोषणा होण्यापूर्वीच पक्ष युद्धपातळीवर आश्वासने देत प्रकल्पांचे उद्घाटन करत आहेत.

जम्मू-काश्मीरमधील निवडणुकांबाबत सुरक्षा यंत्रणांनी निवडणूक आयोगाला परिस्थितीची संपूर्ण माहिती दिली आहे. मुख्य निवडणूक आयुक्त राजीव कुमार आणि निवडणूक आयुक्त अरुण गोयल यांच्यासह आयोगाचे संपूर्ण पॅनल केंद्रशासित प्रदेशाला भेट देणार आहे.

जम्मू-काश्मीरमध्ये शेवटची विधानसभा निवडणूक 2014 मध्ये झाली होती. 2019 मध्ये विशेष राज्याचा दर्जा देणारे कलम 370 रद्द करण्यात आले. यासह राज्याचे विभाजनही झाले. त्यामुळे जम्मू-काश्मीर आणि लडाख हे दोन केंद्रशासित प्रदेश अस्तित्वात आले.

गेल्या वर्षी डिसेंबरमध्ये कलम ३७० हटवण्याच्या निर्णयाला आव्हान देणाऱ्या याचिकांच्या सुनावणीदरम्यान सर्वोच्च न्यायालयाने निवडणूक आयोगाला जम्मू-काश्मीरमध्ये ३० सप्टेंबरपर्यंत निवडणुका घेण्याचे निर्देश दिले होते. कलम ३७० रद्द करण्याच्या केंद्र सरकारच्या निर्णयावर न्यायालयाने शिक्कामोर्तब केले आणि जम्मू-काश्मीरला लवकरात लवकर राज्याचा दर्जा बहाल करण्यासाठी पावले उचलण्याचे निर्देश दिले.