जळगाव, लोकशाही न्यूज नेटवर्क
कारवाई केल्याचा राग आल्यामुळे जळगाव शहरातील पोलीस ठाण्यात येवून एकाने ठाणे अंमलदाराला शिवीगाळ आणि दमदाटी केल्याची धक्कादायक प्रकार समोर आला आहे. याप्रकरणी जळगाव शहर पोलीस ठाण्यात अदखलपात्र गुन्हा दाखल झाला आहे.
जळगाव शहर पोलिस ठाण्यातील हेड कॉन्स्टेबल संजय श्रीधर झाल्टे यांनी विलास हेमलाल सोनवणे (रा. वाल्मिक नगर, जळगाव) याच्याविरुद्ध सीआरपीसी १०७ प्रमाणे कारवाई केली होती. त्याचा राग आल्याने विलास सोनवणे याने बुधवारी संध्याकाळी साडेसात वाजता शहर पोलिस ठाण्यात येवून पोलीस हेड कॉन्स्टेबल झाल्टे यांना दमदाटी केली. तसेच तुला जास्त झालेले आहे. यापुर्वी मी तुझ्यावर केलेले खोटे अर्ज व तुझ्याकडे तपासावर असलेल्या अदखलपात्र फिर्यादीत तुला त्रास व्हावा याकरीता माहीती अधिकार मागितले होते. तरी तुझी जिरलेली नाही. आता मी पुन्हा तुझ्यावरती वरिष्ठांकडे अर्ज व तक्रारी करेल. तू नोकरी कशी करतो?, तुला नोकरी करु देणार नाही आणि तुझी नोकरी कशी खातो तू पहाच, असे बोलून शिवीगाळ केली. याप्रकरणी संजय झाल्टे यांनी दिलेल्या तक्रारीनुसार गुन्हा दाखल करण्यात आला आहे. याबाबत पुढील तपास सहाय्यक फौजदार उल्हास चऱ्हाटे हे करीत आहेत.
