जळगाव, लोकशाही न्यूज नेटवर्क
जळगाव तालुक्यातील कुसुंबा येथून धक्कादायक घटना उघडकीस आलीय. येथील रहिवासी मुलगी ही अल्पवयीन असतांना तिच्या आईवडीलांनी लग्न लावून दिले. त्यातच पतीकडून झालेल्या अत्याचारातून अल्पवयीन मुलीने मुलीला जन्म दिल्याचा खळबळजनक प्रकार बुधवार २७ डिसेंबर रोजी रात्री ८ वाजता समोर आला आहे. याप्रकरणी पतीसह सासू, सासरे आणि आईवडीलांविरोधात एमआयडीसी पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, जळगाव तालुक्यातील कुसुंबा येथील एका भागात १७ वर्षीय अल्पवयीन मुलगी राहते. ती अल्पवयीन आहे हे माहित असतांना तिच्या आईवडीलांनी तिचे लग्न उस्मानाबाद जिल्ह्यातील उमरगा येथील एका तरूणाशी लावून दिले. हे लग्न ऑगस्ट २०२२ मध्ये झाले. तिच्या पतीने ती अल्पवयीन असतांना तिच्यावर अत्याचार केला. या अत्याचारातून पिडीतेने मुलीला जन्म दिला.
दरम्यान सदर प्रकार उघडकीस आल्यानंतर पिडीत मुलीने एमआयडीसी पोलीस ठाण्यात पतीसह सासू सासरे आणि आईवडीलांच्या विरोधात तक्रार दिली. त्यानुसार एमआयडीसी पोलीस ठाण्यात बुधवारी २७ डिसेंबर रोजी रात्री ८ वाजता गुन्हा दाखल करण्यात आला आहे. याप्रकरणी पुढील तपास सपोनि दयानंद सरवदे हे करीत आहे.
