हरियाणा, लोकशाही न्यूज नेटवर्क
हरियाणामधून एक मोठी बातमी समोर आली आहे. एका ढोंगी बाबाने चहामध्ये नशेच्या गोळ्या टाकून तब्बल 120 महिलांवर बलात्कार केल्याची धक्कादायक घटना घडली आहे. हरियाणातील (Haryana) जिलेबी बाबा (Jalebi Baba) ‘सेक्स स्कँडल’ (Sex Scandal) मध्ये दोषी ठरलेल्या बिल्लुराम उर्फ अमरपुरी याने तब्बल 120 महिलांना चहा पाजवून त्यांच्यावर बलात्कार केला. याप्रकरणी 5 जानेवारीला फतेहाबाद न्यायालयानं त्याला 14 वर्षांची शिक्षा सुनावली आहे.
आरोपी जिलेबी बाबाचे 120 हून अधिक अश्लील व्हिडिओ समोर आले आहेत. हा बाबा चहामध्ये नशेच्या गोळ्या मिसळून महिलांना बेशुद्ध करायचा. यानंतर तो त्यांच्यावर बलात्कार करायचा. या घृणास्पद कृत्याचे व्हिडिओही तयार करण्यात आले. 6 पीडित महिलांनी न्यायासाठी याचना केल्यावर हा संपूर्ण प्रकार उघडकीस आला.
बिल्लुराम बाबा हा बालकनाथ डेरामधील बाबा होता. 2018 मध्ये पहिल्यांदा त्याच्या विरोधात तक्रार दाखल करण्यात आली होती. स्टेशन प्रभारींच्या मोबाईलवर अज्ञात क्रमांकावरून आलेल्या एमएमएसच्या आधारे पोलिसांनी ही तक्रार दाखल केली. यानंतर पोलिसांनी बाबावर कारवाई सुरू केली. यादरम्यान असे 120 व्हिडिओ सापडले. यामध्ये तो महिलांसोबत जबरदस्तीनं शारीरिक संबंध ठेवताना दिसत आहे. या व्हिडिओच्या आधारे त्यांना ब्लॅकमेल करायचा.
‘जिलेबी बाबा’ ची कहाणी
बिल्लू राम 2002 मध्ये पंजाबमधील मानसा जिल्ह्यातील अमरवीर तोहना यांच्या संपर्कात आला. नेहरू मार्केटमध्ये त्यानं जिलेबी बनवण्यास सुरुवात केली. व्यवसाय चांगला चालला होता. या दरम्यान त्याच्या पत्नीचा मृत्यू झाला. यानंतर तो एका तांत्रिकाच्या संपर्कात आला, त्यानं त्याला तांत्रिक विद्या शिकवली. यानंतर तो दोन वर्षे गायब होता. वापळला परतल्यावर त्यानं बाबा बालकनाथाचं मंदिर बांधलं. इथं तो आपल्या मुलांसह राहू लागला. त्यानं आपलं नावही बदललं. तंत्राच्या नावानं मंदिरात लोकांची गर्दी होऊ लागली. येथूनच त्यानं महिलांना आपला बळी बनवण्यास सुरुवात केली.
