इंदोर अपघातात प्राण गमावलेल्या आप्तेष्टांची नातेवाईकांनी केले नेत्र आणि त्वचा दान…

 

इंदोर, लोकशाही न्यूज नेटवर्क:

 

मध्य प्रदेशातील इंदूर येथील बेलेश्वर महादेव झुलेलेलाल मंदिरात गुरुवारी रामनवमीनिमित्त आयोजित हवनात प्राचीन पायरीच्या विहिरीचे छत कोसळून ३६ जणांचा मृत्यू झाला. या अपघातात प्राण गमावलेल्या 9 जणांच्या नातेवाईकांनी मृतांचे डोळे आणि त्वचा दान केली आहे. यापैकी सर्व नऊ जणांचे नेत्रदान करण्यात आले, तर चार जणांच्या नातेवाइकांनी नेत्रदानासोबतच त्वचादानाचा निर्णय घेऊन आदर्श घालून दिला आहे.

या अपघातात मधू भस्मानी, भारती कुकरेजा, कनक पटेल, लक्ष्मी बेन पटेल आणि दक्षा बेन पटेल यांच्या नातेवाईकांनी नेत्रदान करण्याचा निर्णय घेतला. आणि भूमिका खानचंदानी, जयंतीबाई, नितीन गंगवाल आणि इंद्रकुमार हरवानी यांच्या कुटुंबीयांनी नेत्रदानासोबतच त्वचादान करण्याचा निर्णय घेतला.

बेलेश्वर महादेव मंदिराच्या 60 फूट खोल विहिरीतून 36 मृतदेह बाहेर काढण्यात आले आहेत. ही घटना गुरुवारी सकाळी 11.30 च्या सुमारास घडली. या अपघाताबाबत श्री बेलेश्वर महादेव झुलेलेलाल मंदिर ट्रस्टचे अध्यक्ष आणि माजी नगरसेवक सेवाराम गलानी आणि सचिव श्रीकांत पटेल आणि कुमार सबनानी यांच्याविरुद्ध कलम ३०४ अन्वये एफआयआर दाखल करण्यात आला आहे. सोबतच या प्रकरणाच्या न्यायालयीन चौकशीचे आदेशही देण्यात आले आहेत.

विशेष म्हणजे इंदूर येथील बागेत बांधलेल्या बेलेश्वर महादेव मंदिरात विहिरीच्या पायरीला बेकायदेशीरपणे सिमेंटचा स्लॅब लावून त्यावर हवन कुंड बनवण्यात आले होते. अपघातातील जखमी हवन करत असताना अचानक हा स्लॅब विहिरीत पडला.