लोकशाही न्यूज नेटवर्क
नवी दिल्ली ; उत्तर प्रदेशच्या गोंडामध्ये नात्याला काळीमा फासणारी एक धक्कादायक घटना समोर आली आहे. प्रेमविवाहानंतर पती हैवान झाला आहे. एका तरुणाने आपल्यासोबत फिरायला चल असं सांगून बाहेर नेलं आणि नंतर गर्भवती पत्नीला चालत्या ट्रेनमधून बाहेर फेकलं आहे.
गर्भवती महिला गंभीर अवस्थेत रात्रभर ट्रॅकवर पडून होती. त्यानंतर सकाळी काही लोकांनी महिलेला अशा अवस्थेत पाहिलं आणि तातडीने पोलिसांना याची माहिती दिली. महिलेला उपचारासाठी तातडीने रुग्णालयात दाखल करण्यात आले आहे.
पोलिसांनी पती आणि त्याच्या कुटुंबियांविरोधात तक्रार दाखल केली आहे. पीडितेने पोलिसांना दिलेल्या माहितीनुसार, पतीने चालत्या ट्रेनमध्ये आधी तिचा गळा दाबला. त्यानंतर तिला ट्रेनमधून बाहेर फेकून दिलं. ती जेव्हा शुद्धीवर आली तेव्हा ती रेल्वे ट्रॅकवर पडलेली पाहायला मिळाली.
नेहा असं या महिलेचं नाव असून ती गर्भवती आहे. नेहा पंजाबच्या लुधियानामध्ये राहते. ती एका कम्पूटर इन्स्टीट्यूटमध्ये टीचर म्हणून काम करत होती. तिथेच ज्ञानचंद शर्मा नावाचा तरुण शिकायला यायचा.
लग्नानंतर वारंवार छोट्यामोठ्या कारणांवरून वाद
क्लासमध्ये नेहा आणि ज्ञानचंदची ओळख झाली आणि ते एकमेकांच्या प्रेमात पडले. पुढे त्यांनी कोर्टात जाऊन लग्नही केलं. लग्नानंतर मात्र वारंवार त्यांच्यात छोट्यामोठ्या कारणांवरून वाद होत होते. सासरची मंडळी मानसिक आणि शारीरीक छळ करायची.
सासू हुंड्यासाठी नेहमीच टोमणे मारायची. तसेच मुलाला सुनेबद्दल वाईट गोष्टी सांगून भडकवायची. यानंतर पती आपल्याला मारहाण करत असल्याचं नेहाने म्हटलं आहे. तिने आत्महत्येचा देखील प्रयत्न केला होता.
चालत्या ट्रेनमध्ये नेहाचा गळा दाबला आणि बाहेर फेकलं
लखनऊला घेऊन जातो असं सांगून पती तिला मनकापूर रेल्वेस्टेशनवर घेऊन आला. त्यानंतर चालत्या ट्रेनमध्ये नेहाचा गळा दाबला आणि बाहेर फेकलं. जखमी अवस्थेतील महिलेला स्थानिकांनी उपचारासाठी जिल्हा रुग्णालयात दाखल केलं आहे. तिच्यावर सध्या उपचार सुरू आहेत.
या घटनेने परिसरात एकच खळबळ उडाली आहे. पोलीस देखील या प्रकरणाचा अधिक तपास करत असून अनेकांची चौकशी करण्यात येत आहे. एका हिंदी वेबसाईटने याबाबतचे वृत्त दिले आहे.
