मोठी बातमी; ‘थ्री इडियट्स’ मधील लायब्ररीयन दुबेची भूमिका साकारणाऱ्या अभिनेत्याच निधन

मुंबई, लोकशाही न्यूज नेटवर्क

आमिर खानच्या ‘थ्री इडियट्स’ या चित्रपटात लायब्ररीयन दुबेची भूमिका साकारणारे अभिनेते अखिल मिश्रा यांचं दुर्दैवी निधन झाले आहे. एका उंच इमारतीवरून पडून त्यांचं निधन झाल्याची माहिती समोर येत आहे. त्यांचे मित्र आणि ॲक्टिंग कोच कुलविंदर बक्षी यांनी अखिल मिश्रा यांच्या निधनाच्या वृत्ताला दुजोरा दिला आहे. अखिल हे ५८ वर्षांचे होते त्यांच्या पार्थिवाला शवविच्छेदनासाठी पाठविण्यात आले आहे. अखिल यांनी बऱ्याच मालिका आणि चित्रपटांमध्ये काम केले आहे.

त्यांनी भंवर, उतरण, सीआयडी, श्रीमान श्रीमती, भारत एक खोज, रजनी यांसारख्या मालिकांमध्ये भूमिका साकारल्या आहेत. तर डॉन, हजारों ख्वाहिशें, गांधी माय फादर, शिखर, थ्री इडियट्स यांसारख्या चित्रपटांमध्ये त्यांनी काम केलं आहे. आमिर खानच्या ‘थ्री इडियट्स’ या चित्रपटात त्यांनी साकारलेली लायब्ररीयन दुबेची भूमिका विशेष अशी गाजली होती.

अखिल यांनी जर्मन अभिनेत्री सुझान बर्नर्टशी लागण केले. ३ फेब्रुवारी २००९ मध्ये दोघांनी कोर्ट मॅरेज केले. त्यांनतर ३० सप्टेंबर २०११ रोजी त्यांनी पारंपरिक विवाहपद्धतीनुसार पुन्हा लग्न केले होते. अखिल यांच्या निधनाचे वृत्त समजताच त्यांची पत्नी पूर्णपणे खचली आहे. “मी पूर्णपणे खचले आहे, माझ्या जोडीदाराने मला एकटं सोडलं, अशा शब्दात तिने आपल्या भावना व्यक्त केला आहे.