नवी दिल्ली, लोकशाही न्यूज नेटवर्क:
लोकसभेतील काँग्रेस नेते अधीर रंजन चौधरी यांनी केंद्र सरकारने सर्व खासदारांना पाठवलेल्या संविधानाच्या प्रतमधून धर्मनिरपेक्ष आणि समाजवादी असे शब्द गायब झाल्याचा मुद्दा उपस्थित केला आहे. नवीन संसद भवनाच्या उद्घाटनाच्या पहिल्याच दिवशी खासदारांना देण्यात आलेल्या संविधानाच्या प्रतीतून हे दोन शब्द काढून टाकण्यात आल्याचे त्यांनी सांगितले.
“हे शब्द 1976 मध्ये दुरुस्तीनंतर जोडले गेले”
अधीर रंजन चौधरी म्हणाले की, आज (19 सप्टेंबर) संविधानाच्या नवीन प्रती आम्हाला देण्यात आल्या आहेत, ज्या आम्ही आमच्या हातात घेऊन (नवीन संसद भवन) प्रवेश केला. त्याच्या प्रस्तावनेत ‘समाजवादी धर्मनिरपेक्ष’ असे शब्द नाहीत. 1976 मध्ये दुरुस्ती करून हे शब्द जोडले गेले हे आपल्याला माहीत आहे, पण आज कोणी आपल्याला संविधान देत असेल आणि हे शब्द नसतील तर ती चिंतेची बाब आहे.
“इंडिया आणि भारतामध्ये फरक नाही ”
अधीर रंजन चौधरी पुढे म्हणाले की त्यांचा (केंद्राचा) हेतू संशयास्पद आहे. हे अत्यंत हुशारीने केले आहे. ही माझ्यासाठी चिंतेची बाब आहे. मी हा मुद्दा मांडण्याचा प्रयत्न केला, पण संधी मिळाली नाही. तत्पूर्वी, मंगळवारी लोकसभेत बोलताना काँग्रेस नेते अधीर रंजन चौधरी म्हणाले होते की, ‘इंडिया’ आणि ‘भारत’मध्ये विनाकारण तेढ निर्माण करण्याचा कोणीही प्रयत्न करू नये. भारतीय राज्यघटनेनुसार या दोघांमध्ये कोणताही फरक नाही.
ते पुढे म्हणाले की, हे संविधान आमच्यासाठी गीता, कुराण आणि बायबलपेक्षा कमी नाही. कलम 1 म्हणते की ” इंडिया, म्हणजेच भारत, राज्यांचा संघ असेल…”, म्हणजे इंडिया आणि भारत यांच्यात कोणताही फरक नाही. दोघांमध्ये विनाकारण तेढ निर्माण करण्याचा प्रयत्न कोणी केला नाही तर बरे होईल.
