पुणे, लोकशाही न्यूज नेटवर्क
मंगळवार २७ जून रोजी सकाळी सदाशिव पेठेत एक धक्कादायक प्रकार घडल्याचे समोर आलं. युवक आणि युवतीवर प्राणघातक हल्ला कोयत्याने करण्यात आला होता. परंतु नागरिकांच्या सतर्कतेने त्या तरुणीचे प्राण वाचले आहे. पुणेकरांनी हल्ला करणाऱ्या माथेफिरुला पुणे पॅटर्न दाखवत चांगलाच चोप दिला आहे. त्यामुळे तरुणीचे प्राण वाचले आहे. नाही तर पुणे शहरात पुन्हा अनर्थ घडला असता. माथेफिरू तरुणास, धाडसाने ताब्यात घेणाऱ्या युवकाचे कौतुक करण्यात येत आहे.
असा घडला प्रकार
पुणे शहरातील सदाशिव पेठेत मंगळवारी सकाळी युवक आणि युवतीवर हल्ला झाल्याने खळबळ उडाली. कोयत्याने हा जीवघेणा हल्ला करण्यात आला. अगदी पेरूगेट पोलीस चौकीजवळ हि घटना घडली आहे. या ठिकाणी युवक आणि युवती गाडीवरून उतरले असता, आरोपी शंतनू जाधव कोयता घेऊन त्या दोघांच्या मागे धावत आला. त्याने दोघांवर हल्ला करण्याचा प्रयत्न केला. युवक एका दिशेने पळाला तर युवती दुसऱ्या दिशने पळाली. आरोपीने तरुणीच्या मागे धाव घेत तिच्यावर हल्ला करणार तोच, काही युवकांच्या सतर्कतेमुळे त्या युवकांनी त्याला पकडले. त्याच्या हातातून कोयता घेत त्याला चांगलेच चोपले व पोलिसांच्या हवाली केले.
