मुक्ताईनगर, लोकशाही न्यूज नेटवर्क:
अवजड वाहन रस्त्याच्या कडेला बेकायदेशीरित्या उभा असल्याने बसला ओव्हरटेक करण्याच्या नादात दुचाकीस्वार बसच्या चाकाखाली आल्याने दुचाकीस्वाराचा जागीच मृत्यू झाल्याची घटना शुक्रवारी १३ ऑक्टोबर रोजी सायंकाळी घडली आहे. तर दुचाकीवरील सोबत असलेला एक जण थोडक्यात बचावला आहे. ही घटना मुक्ताईनगर शहरातील संत मुक्ताई महाविद्यालयसमोर घडली आहे. किसन उर्फ कृष्णा तलवारे (३४) रा. बोदवड. ह.मु. इच्छापुर ता. मुक्ताईनगर असे मयत तरूणाचे नाव आहे.
मुक्ताईनगर शहरातून गेलेल्या छत्रपती संभाजीनगर ते बऱ्हाणपूर राष्ट्रीय महामार्गावर असलेल्या संत मुक्ताबाई महाविद्यालयासमोर अपघातात अवजड वाहतूक करणारा ट्रक हा अवैधपणे रस्त्याच्याकडून जात होता तो बेशिस्त उभा राहिला. दरम्यान याच काळात मागून येणाऱ्या बस क्रमांक (एमएच १० डीएल ३५५५) ला आव्हरटेक करतांना दुचाकीने किसन तलवारे व तुळशीराम वानखेडे हे दोघेजण येथून सोबत जात होते. त्यावेळी अचानक दुचाकीवरील ताबा सुटल्याने दुचाकीस्वार हा बसच्या चाकाखाली आला. यावेळी किसन तलवारे या तरूणाचा जागीच मृत्यू झाला. तर सोबत असलेला तुळशीराम वानखेडे थोडक्यात सुदैवाने बचावला आहे. घटनेची माहिती मिळताच मुक्ताईनगर शहरातील स्थानिक पोलीसांनी घटनास्थळी धाव घेतली. मृतदेह उपजिल्हा ग्रामीण रूग्णालयात हलविण्यात आलेला आहे. रात्री उशिरा पर्यंत पोलिसात गुन्हा दाखल करण्याची प्रक्रिया सुरू होती.
