लोकशाही न्यूज नेटवर्क
शहरातील नूतन मराठा महाविद्यालय परिसरात रस्त्याने जाणाऱ्या वृद्ध महिलेला दोघांनी गाठून भविष्य सांगण्याच्या नावाखाली तुमच्या घरी लक्ष्मी आली आहे असे सांगून बोलण्यात गुंतवून ४० हजार रुपये किमतीची सोनसाखळी लंपास केल्याची घटना घडली असून याप्रकरणी दोन भामट्यांविरुद्ध गुन्हा दाखल करण्यात आला आहे.
कानळदा येथील कमलाबाई रामचंद्र सोनवणे या येथे राहतात . जळगावातील त्यांच्या नातीला बाळंतपणासाठी शाहूनगरातील हॉस्पिटलमध्ये दाखल केले असून बुधवारी सकाळी 11 वाजेच्या सुमारास कमलबाई या नातीकरीता जेवणाचा डबा देण्यासाठी गेल्या होत्या. डबा देवून दुपारी 12.30 वाजेच्या सुमारास त्या पायी घराकडे जाण्यासाठी निघाल्या असतानाच नूतन मराठा कॉलेजच्या समोर युनिक अकॅडमी समोरील रोडने आलेल्या दोघा भामट्यांनी त्यांना थांबवले. तुमच्या घरी लक्ष्मी आली आहे. मी तुमचे भविष्य सांगतो, असे म्हणून रस्त्याच्या बाजूला बसवले. बोलण्यात गुंतऊन कमलबाई यांच्या गळ्यातील सोन्याची पोत काढून घेत कागदाच्या पुडीत ठेवून भामट्यांनी कागदाची पुडीची अदला-बदली केली. त्यानंतर दुनियादारी चांगली नाही तुझ्या गळ्यातील पोत कागदावर ठेव आणि घरी गेल्यावरच उघड, असे त्यांनी वृद्धेला सांगितले.
वृद्धेने गळ्यातील पोत काढून कागदावर ठेवत शाहूनगर परीसरातील हॉस्पिटलमध्ये गेली. यानंतर वृद्ध महिलेने हातातील पुडी आपल्या नातीकडे दिली. तिने पुडी उघडून बघितली असता त्यात सोन्याची पोत दिसून आली नाही. आपली फसवणुक झाल्याची खात्री झाल्यानंतर शहर पोलिसात तक्रार दिल्याने दोन अज्ञात भामट्यांविरुद्ध गुन्हा दाखल करण्यात आला. हवालदार सिकंदर तडवी पुढील तपास करीत आहेत.
