क्रीडा, लोकशाही न्यूज नेटवर्क;
IPL 2024 मध्ये, BCCI ने स्टार फलंदाज विराट कोहलीवर मोठी कारवाई केली आहे. कोलकाता नाईट रायडर्स आणि रॉयल चॅलेंजर्स बंगळुरू यांच्यात झालेल्या सामन्यादरम्यान विराट कोहली पंचांशी वाद घालताना दिसला. त्याच्या विकेटनंतर तो खूप दुखी दिसत होता. अशा परिस्थितीत आयपीएलच्या आचारसंहितेचे उल्लंघन केल्याप्रकरणी विराट कोहलीला दंड ठोठावण्यात आला आहे.
विराट कोहलीवर बीसीसीआयची मोठी कारवाई
कोलकाता नाईट रायडर्सविरुद्ध खेळल्या गेलेल्या सामन्यात विराट कोहली फुल टॉस बॉलवर बाद झाला. हा चेंडू कमरेच्या वरचा आहे, असा त्याचा विश्वास होता. मात्र पंचांनी त्याला बाद घोषित केले. पंचांच्या या निर्णयावर तो खूप नाराज दिसला आणि पॅव्हेलियनमध्ये परतण्यापूर्वी वाद घालतानाही दिसला. अशा परिस्थितीत बीसीसीआयने आता पंचांच्या निर्णयाशी असहमती दाखवल्याबद्दल विराट कोहलीवर मॅच फीच्या 50% दंड ठोठावला आहे.
हर्षित राणाच्या चेंडूवर त्याची विकेट गेली
कोलकाता नाईट रायडर्सविरुद्धच्या दुसऱ्या डावातील तिसऱ्या षटकात हर्षित राणाच्या षटकातील पहिल्या चेंडूवर विराट कोहली स्लो फुल टॉस चेंडूवर बाद झाला. त्यानंतर विराट कोहलीने रिव्ह्यू मागितला आणि रिव्ह्यूनंतरही अंपायरने त्याला आऊट दिले. यावेळी विराट कोहली चांगलाच चिडलेला दिसत होता. यानंतर विराट रागाने अंपायरशी बोलला आणि पॅव्हेलियनच्या दिशेने परतला. एवढेच नाही तर निघताना हाताने डस्टबीनही खाली पाडले.
आयपीएलच्या नवीन नियमांनुसार विराट आउट
इंडियन प्रीमियर लीगमध्ये नो-बॉलची उंची मोजणारा हॉक-आय ट्रॅकिंग नियम लागू आहे. या अंतर्गत, क्रिझमधील फलंदाजाच्या कमरेच्या उंचीवरून चेंडूच्या उंचीचे मूल्यांकन करून नो बॉलचा निर्णय घेतला जातो. शॉट खेळताना कोहली क्रीजच्या बाहेर होता आणि चेंडू त्याच्या कमरेच्या वर होता पण तो खाली येत होता. टीव्ही अंपायर मायकेल गॉफ यांनी उंची तपासली आणि हॉक-आय ट्रॅकिंगनुसार, कोहली क्रीजमध्ये असता तर चेंडू कंबरेजवळून 0.92 मीटरच्या उंचीवरून गेला असता. या स्थितीत चेंडू कोहलीच्या कमरेच्या उंचीपेक्षा (1.04 मीटर) खाली गेला असता. अशा स्थितीत, बॉल ट्रॅकिंग स्केलवर गॉफला चेंडूची उंची कोहलीच्या कमरेच्या उंचीपेक्षा कमी असल्याचे आढळले आणि त्याला बाद घोषित केले.
