ओडिशा, लोकशाही न्यूज नेटवर्क:
ओडिशातील बालासोर येथे २ जून रोजी झालेल्या रेल्वे अपघातात सीबीआयने शुक्रवारी ३ रेल्वे कर्मचाऱ्यांना अटक केली. तिघांनाही भादंवि कलम ३०४ (सदोष मनुष्य वधाचा गुन्हा) अन्वये अटक करण्यात आली आहे. या रेल्वे अपघातात गुन्हेगारी कट असण्याची शक्यता केंद्रीय तपास यंत्रणा तपासत होती. वरिष्ठ विभाग अभियंता अरुणकुमार महंतो, वरिष्ठ विभाग अभियंता मोहम्मद अमीर खान आणि तंत्रज्ञ पप्पू कुमार अशी अटक करण्यात आलेल्या तीन रेल्वे कर्मचाऱ्यांची नावे आहेत. कलम ३०४ नुसार जन्मठेप आणि दंड किंवा सश्रम कारावास अशी शिक्षा आहे. या तिघांच्या निष्काळजीपणामुळेच एवढी मोठी दुर्घटना घडल्याचे सूत्रांचे म्हणणे आहे.
बालासोर येथील बहंगा बाजार रेल्वे स्थानकाजवळ २ जून रोजी सायंकाळी ७ वाजण्याच्या सुमारास कोरोमंडल एक्सप्रेस स्थानकावर उभ्या असलेल्या मालगाडीला धडकली. बेंगळुरू-हावडा सुपरफास्ट एक्स्प्रेसही त्याच्या कचाट्यात आली. या रेल्वे अपघातात 292 जणांचा मृत्यू झाला असून 1000 हून अधिक लोक जखमी झाले आहेत.
आता एकही ट्रेन बहनगा बाजार स्टेशनवर थांबत नाही
बहनगा बाजार रेल्वे स्थानकावरून दररोज सुमारे 170 गाड्या जातात. अपघातानंतर सीबीआयने लॉग बुक, रिले पॅनल आणि उपकरणे जप्त करून स्टेशन सील केले. बहनगा बाजार स्थानकावर सध्या एकही गाडी थांबत नाही.
बालासोर ट्रेन दुर्घटनेची चौकशी करत असलेल्या रेल्वे सुरक्षा आयुक्तांनी (CRS) गेल्या आठवड्यात सिग्नलिंग विभागाच्या कर्मचार्‍यांवर मानवी चुकीचा ठपका ठेवला होता. तोडफोड, तांत्रिक बिघाड किंवा मशीनमध्ये बिघाड होण्याची शक्यता त्यांनी फेटाळून लावली.
सीआरएसने कर्मचाऱ्यांचा निष्काळजीपणा उघड केला
तीन वर्षांपूर्वी सुरक्षेच्या कारणास्तव डिझाईन बदलल्यानंतर तपासणीच्या पुरेशा सुरक्षा प्रक्रियेचे पालन न करणाऱ्या काही ग्राउंड अधिकाऱ्यांच्या निष्काळजीपणाचा CRS ने कथितपणे पर्दाफाश केला होता.
३ जून रोजी एफआयआर नोंदवण्यात आला
3 जून रोजी ओडिशातील तिहेरी रेल्वे अपघाताबाबत बालासोर येथील जीआरपीएसमध्ये एफआयआर नोंदवण्यात आला होता. त्यानंतर रेल्वेमंत्र्यांनी या घटनेची सीबीआय चौकशीची मागणी केली. केंद्र सरकारच्या संमतीनंतर सीबीआयने हे प्रकरण आपल्या हातात घेतले होते.
आतापर्यंत 42 मृतदेहांची ओळख पटलेली नाही
ओडिशा रेल्वे अपघातात प्राण गमावलेल्या ४२ मृतदेहांची अद्याप ओळख पटलेली नाही. त्यामुळे 42 मृतांचे मृतदेह अजूनही भुवनेश्वरच्या रुग्णालयात ठेवण्यात आले आहेत. या मृतदेहांच्या डीएनए चाचणीचा अहवाल अद्याप प्रलंबित आहे. त्याचवेळी डीएनए अहवाल लवकरच येणे अपेक्षित आहे.
काही मृतांबाबत, कुटुंबातील एकही सदस्य किंवा नातेवाईक मृतदेह घेण्यासाठी आलेले नाहीत. तर, अपघातानंतर 81 मृत प्रवाशांची डीएनए चाचणी करण्यात आली. यामध्ये ३९ मृतांचे डीएनए नमुने जुळल्यानंतर मृतदेह अंत्यसंस्कारासाठी त्यांच्या कुटुंबीयांच्या ताब्यात देण्यात आले.
