मुंबई, लोकशाही न्यूज नेटवर्क:
खान्देशातील कर्करोग रुग्णांना उत्तम आणि उत्कृष्ट सेवा आणि जनजागृती केल्याबद्दल चांडक कॅन्सर हॉस्पिटलला राजभवन येथे राज्यपाल भगतसिंग कोश्यारी यांच्या हस्ते एक्सलन्स ऑन्कोलॉजी पुरस्काराने सन्मानित करण्यात आले आहे. कार्यक्रमात प्रमुख पाहुणे म्हणून माहेश्वरी यांच्यासह मान्यवर व्यासपीठावर उपस्थित होते.
जळगाव खान्देशातील प्रख्यात कॅन्सर सर्जन डॉ.निलेश चांडक आणि चांडक कॅन्सर हॉस्पिटल यांनी जळगावसारख्या छोट्या शहरात कॅन्सरसारख्या घातक आजारावर या आजाराबाबत जनजागृती करून रुग्णांसाठी मुंबई पुण्यासारख्या महानगरातील सुविधा उपलब्ध करून दिल्या आहेत. डॉ. चांडक यांनी आतापर्यंत पाच हजारांहून अधिक कॅन्सर रुग्णांच्या गुंतागुंतीच्या शस्त्रक्रिया आणि एक हजाराहून अधिक कॅन्सरपासून बचाव करण्याबाबत जनजागृती शिबिरांना संबोधित केले आहे. जळगाव आणि अकोल्यातील शासकीय वैद्यकीय महाविद्यालय रुग्णालयात गरीब रुग्णांवर उपचार करून त्यांनी अनेकांना जीवनदान दिले आहे. त्यांच्या कार्याचा गौरव करून त्यांना एक्सलन्स ऑन्कोलॉजी पुरस्काराने सन्मानित करण्यात आले आहे.
यावेळी राज्यपाल भगतसिंग कोश्यारी म्हणाले की, कॅन्सरसारख्या आजारात डॉ.निलेश चांडक यांचे प्रयत्न अनुकरणीय आहेत. छोट्या शहरातील कॅन्सरग्रस्तांना ते नवजीवन देत आहेत. हा सन्मान मिळाल्याबद्दल चांडक कॅन्सर हॉस्पिटल आणि डॉ. निलेश चांडक यांचे अभिनंदन करण्यात आले आहे.
