औरंगाबाद, लोकशाही न्यूज नेटवर्क
गोयगाव ता. वैजापूर येथे महाराष्ट्राला हादरून टाकणारी घटना घडली आहे. प्रेमविवाह केल्याने युवतीचे आईसह भावाने कोयत्याने शीर तोडून धडावेगळे करून निर्घृण खून केल्याची घटना रविवारी दुपारी घडली. कीर्ती ऊर्फ किशोरी थोरे (वय १९) असे मृत विवाहित युवतीचे नाव आहे. मयत मुलगी दोन महिन्यांची गरोदर असल्याची देखील माहिती मिळाली आहे.
Maharashtra | Incident of cold-blooded murder of a 19-year-old woman by her brother & mother is reported in the district.The mother & the brother said that they killed her as she got married to a man of her choice. Accused arrested after confession of the crime: Aurangabad Police
— ANI (@ANI) December 6, 2021
सदर घटनेनंतर आरोपी आई शोभा मोटे (वय ४०) आणि भाऊ संकेत मोटे (वय १९) यांनी थेट पोलीस ठाणे गाठून या खुनाची कबुली दिली.
गोयगाव येथील मोटे कुटुंबातील कीर्ती हिने २१ जून २०२१ रोजी गावातीलच अविनाश थोरे या तरुणाशी प्रेमविवाह केला होता. याला मोटे कुटुंबीयांचा विरोध होता. कीर्तीची आई व भावाने कट रचून तिच्या घरी येणे-जाणे सुरू केले. रविवारी दुपारी आई व भाऊ तिला भेटायच्या निमित्ताने तिच्या घरी गेले. त्यावेळी तिचा पती अविनाश झोपलेला होता. कीर्ती चहा करण्यासाठी स्वयंपाक घरात गेल्यावर तिच्या पाठोपाठ तिचा भाऊ आणि आई पण गेली.
यादरम्यान आईने तिला धरून ठेवत भावाने कोयत्याने तिच्या मानेवर सपासप वार करून कीर्तीचे शिर काही क्षणातच धडावेगळे केले. पती अविनाश याने हा घटनाक्रम पाहिल्यावर तो घाबरून घराबाहेर पळाला. यानंतर आरोपी आई व भाऊ याने धडावेगळे केलेले शीर ओट्यावर ठेवून थेट वीरगाव पोलीस ठाणे गाठले आणि खुनाची कबुली दिली.