मुंबई, लोकशाही न्यूज नेटवर्क
दहावीच्या विद्यार्थ्यांसाठी महत्वाची बातमी आहे. महाराष्ट्र राज्य माध्यमिक आणि उच्च माध्यमिक शिक्षण मंडळाकडून दहावीच्या बोर्डाच्या परीक्षेचं हॉल तिकीट बुधवार म्हणजेच उद्यापासून ऑनलाइन उपलब्ध करून दिले जणार आहे. विद्यार्थी 31 जानेवारीपासून आपलं हॉल तिकीट ऑनलाइन मिळवू शकणार आहेत. राज्य शिक्षण मंडळाच्या सचिवांनी याबाबत माहिती दिली आहे.
मिळालेल्या माहितीनुसार, दहावीच्या बोर्डाच्या परीक्षेला बसणाऱ्या विद्यार्थ्यांना 31 जानेवारीपासून हॉल तिकीट मिळणार आहे. विद्यार्थ्यांना आपल्या शाळांमार्फत हे हॉल तिकीट मिळणार आहेत अशी माहिती राज्य मंडळाच्या सचिव यांनी दिली आहे. राज्य मंडळाकडून दहावीची बोर्डाची परीक्षा 1 ते 26 मार्च दरम्यान घेण्यात येणार आहे. तसेच दहावीची प्रात्यक्षिक, श्रेणी, तोंडी आणि अंतर्गत मूल्यमापन परीक्षा 10 फेब्रुवारीपासून सुरू होत आहे. या परीक्षेसाठी विद्यार्थ्यांना ऑनलाइन हॉल तिकीट उपलब्ध करून देण्यात येत आहे.
शिक्षण मंडळाच्या http://www.mahahsscboard.in या अधिकृत संकेतस्थळावर बुधवारपासून दहावीच्या विद्यार्थ्यांचे हॉल तिकीट उपलब्ध होणार आहेत. सर्व माध्यमिक शाळांना मार्च 2024च्या परीक्षेचं हॉल तिकीट ऑनलाइन पद्धतीने हे हॉल तिकीट काढता येईल. मंडळाने दिलेल्या ‘स्कूल लॉगिन’मध्ये हे हॉल तिकीट डाऊनलोड करून घेण्याची सोय उपलब्ध असेल. दहावीच्या परीक्षेसाठी सर्व माध्यमिक शाळांनी विद्यार्थ्यांना ऑनलाइन हॉल तिकीट प्रिंट करून द्यायचे आहेत. हॉल तिकीट प्रिंट करून देताना विद्यार्थ्यांकडून कोणतेही वेगळे शुल्क घेऊ नये. तसेच त्या हॉल तिकीटची प्रिंट काढून त्यावर मुख्याध्यापकांचा शिक्का मारून स्वाक्षरी करावी, अशा सूचना करण्यात आल्या आहेत. पुणे, मुंबई, कोल्हापूर, नाशिक, नागपूर, छत्रपती संभाजीनगर, अमरावती, लातूर आणि कोकण या ९ विभागीय मंडळातर्फे ही परीक्षा घेण्यात येणार आहे.
