मुंबई, लोकशाही न्यूज नेटवर्क
उद्धव ठाकरे यांची शिवसेना आणि शरद पवार यांच्या नेतृत्वाखालील राष्ट्रवादी हेच खरे पक्ष आहेत. बाकी अमित शहा यांनी एकनाथ शिंदे आणि अजित पवार यांना जे डुप्लिकेट पक्ष दिले आहेत, त्यांचा निकाल जनता लावल्याशिवाय राहणार नाही, असे संजय राऊत यांनी म्हटले आहे.
उद्धव ठाकरे यांची शिवसेना, शरद पवार यांचा पक्ष आणि काँग्रेस हे तिन्ही पक्ष नकली असून ते महाराष्ट्राचे काय हित करणार, अशी टीका केंद्रीय गृहमंत्री अमित शहा यांनी नांदेड येथील जाहीर सभेतून केली. उबाठा आणि राष्ट्रवादी शरदचंद्र पवार गट हे पक्ष अर्धे होते आता दोघांनी मिळून काँग्रेस पक्षाला अर्ध केले, असा टोलाही अमित शहा यांनी हाणला. दरम्यान, अमित शहा यांच्या या टीकेचा शिवसेना खासदार संजय राऊत यांनी चांगलाच समाचार घेतला आहे.
महाराष्ट्रामध्ये उद्धव ठाकरे यांची शिवसेना आणि शरद पवार यांच्या नेतृत्वाखालील राष्ट्रवादी हेच खरे पक्ष आहेत. बाकी अमित शहा यांनी एकनाथ शिंदे आणि अजित पवार यांना जे डुप्लिकेट पक्ष दिले आहेत, त्यांचा निकाल जनता लावल्याशिवाय राहणार नाही, असे संजय राऊत यांनी म्हटले आहे. अमित शहा यांनी जे विधान केले ते आधी पंतप्रधान नरेंद्र मोदी यांनी केले होते. असली कोण आणि नकली कोण? हे अमित शहा ठरवू शकत नाही, असेही संजय राऊत म्हणाले. उद्धव ठाकरे जर नकली शिवसेनेचे प्रमुख आहेत, तर 2019 साली तुम्ही त्यांना भेटण्यासाठी मातोश्रीवर का आला होता? असा सवालही संजय राऊत यांनी अमित शहांना विचारला आहे.
कपाळमोक्ष होणार !
आता तुम्ही शिवसेना (शिंदे गट) आणि राष्ट्रवादी काँग्रेस (अजित पवार गट) पक्षाचे खोटे गोटे गळ्यात अडकून फिरत आहात, हेच गोटे तुमचा कपाळमोक्ष केल्याशिवाय राहणार नाही, असा इशाराही संजय राऊत यांनी अमित शहा यांना दिला आहे. अजित पवार आणि एकनाथ शिंदे यांच्या डुप्लिकेट पक्षाचा निकाल जनताच लावेल, असेही राऊतांनी सांगितले आहे.
