तब्बल १२ दिवस मृत्युशी झुंज देणाऱ्या बाळाचे प्राण वाचवण्यास डॉक्टर यशस्वी

पाचोरा लोकशाही न्युज नेटवर्क
निंबायती येथील रहिवासी अजामल जयसिंग राठोड यांचा अवघ्या दोन वर्षांचा बाळ लकी राठोड तब्बल दहा दिवसांपासुन आजारी होता. प्रकृती सुधारण्या ऐवजी अधिकच खालावत चालली होती. अखेर बाळाच्या माता – पित्यांनी पाचोरा शहर गाठले आणि येथील सिद्धीविनायक मल्टीस्पेशलिटी हॉस्पीटल मध्ये डॉ. ग्रीष्मा स्वप्निल पाटील यांच्याकडे दाखल केले.

तपासणी अंती फुप्फुसांमध्ये न्यूमोनिया झाल्यामुळे त्याची परिस्थिती अधिकच गंभीर बनली होती. फुप्फुसांमध्ये न्यूमोनिया सोबतच ऑक्सिजनची पातळी कमी यामुळे बालकाची प्रकृती खालावत होती. अशा परिस्थितीत सिद्धिविनायक मल्टीस्पेशलिटी हॉस्पिटलच्या बालरोग तज्ञ डॉ. ग्रीष्मा पाटील यांनी खंबीर भूमिका घेत बाळाच्या नातेवाईकांना धिर देत मृत्यूशी झुंज देणाऱ्या बालकावर तातडीने उपचार सुरू केले. परिणामतः तब्बल १२ व्या दिवशी बाळ लकी राठोड नावाप्रमाणे लकी ठरला. व त्याने अखेर मृत्यूवर विजय प्राप्त केला.

अर्थात यासाठी देवदुता प्रमाणे संभाव्य परिस्थिती व परिणाम याचा विचार करून ज्यांनी प्रयत्न केले त्या डॉ. ग्रीष्मा स्वप्निल पाटील व त्यांच्या हॉस्पिटल स्टाफ यांनी केलेल्या प्रयत्नांना यश प्राप्त झाले. आपलं बाळ सुखरूप घरी परतत असतांना त्या मातेच्या डोळ्यातून आलेले आनंदाश्रू डॉक्टरांबद्दल कृतज्ञता व्यक्त करत होते. विशेष म्हणजे स्वतंत्र मायक्रोफायनान्स या बचत गटाचा केअर हेल्थचा (मेडी क्लेम) असल्याने या मुलाचा संपुर्ण उपचार स्वतंत्र मायक्रोफायनान्स ची कॅशलेस सुविधा असलेल्या पाचोरा येथील सिद्धिविनायक मल्टीस्पेशालिटी हॉस्पिटल येथे निशुल्क झाल्याने बचत गटाला देखील मेडीक्लेम अॅण्ड कॅशलेस सुविधेचे महत्व कळून आले आहे.