लोकशाही न्यूज नेटवर्क
मध्य प्रदेशातील सिहोरमधील कुबेरेश्वर धाम येथे महाशिवरात्री निमित्त मोफत रुद्राक्ष वाटप महोत्सवात मोठी चेंगराचेंगरी झाली. उत्सवादरम्यान शुक्रवारी एका तीन वर्षांच्या चिमुरड्याचा मृत्यू झाल्याची माहिती एका हिंदी वृत्तवाहिनीने दिली आहे.
पंडित प्रदीप मिश्रा यांनी आयोजित केलेल्या रुद्राक्ष महोत्सवात जळगावचे विवेक विनोद भट्ट गुरुवारी पत्नी आणि दोन मुलांसह गेले होते. भट्ट यांनी सांगितले की, 3 वर्षांचा मुलगा अमोघ भट्टची प्रकृती पूर्वीपेक्षा थोडी बिघडली होती. वाहनाची सोय नसल्याने पायी आलो. वाटेत मुलाची तब्येत बिघडली. आम्ही त्याला जिल्हा रुग्णालयात नेले, जिथे त्याला आयसीयूमध्ये दाखल करण्यात आले. मात्र शुक्रवारी सकाळी डॉक्टरांनी मुलाला मृत घोषित केले.
या ठिकाणी देशभरातून लाखो लोक जमा झाले आहेत. वाहनांच्या वीस किलोमीटरपेक्षा जास्त रांगा लागल्या आहेत. दरम्यान महाराष्ट्रातून देखील हजारो लोक या कार्यक्रमात सहभागी झाले आहेत.
