जळगाव, लोकशाही न्यूज नेटवर्क
जळगाव शहरातील तापमान गेल्या काही दिवसांपासून चढ उतार होत असल्याचे चित्र आहे. शहरात रात्री गारठा जाणवतोय तर दिवसा प्रचंड उन्हाचे चटके बसत असल्याची परिस्थिती आहे. राज्यातील सर्वात कमी तापमानाची नोंद जळगावात करण्यात आली आहे. जळगावात तीन दिवसांपासून रात्रीचा पारा घसरत आहे तर दिवसा मात्र हा पारा ३५ अंशावर पोहचला आहे. म्हणून जळगावकर एकच वेळी थंडी आणि उन्हाचा अनुभव घेत आहेत.
जागतिक हवामान बदलाचा परिणाम जळगाव जिल्ह्यावर होत आहे. हवामान विभागाने दिलेल्या माहितीनुसार, पश्चिमी विक्षोभ व दक्षिण सिंध भागात निर्माण झालेल्या अँटीसायक्लोनिक स्थितीमुळे उन्हाळ्यातील कोरड्या हवेसारखी स्थिती निर्माण होत आहे. दरम्यान त्याचवेळेस उत्तरेकडून येणारे थंड वारे कायम असल्याने एकाचवेळी वातावरणात चढ उतार होत आहे.
