पाळधी, लोकशाही न्यूज नेटवर्क
गाडगे महाराजांच्या पुण्यतिथीनिमित्त भाऊसाहेब गुलाबराव पाटील इंग्लिश मीडियम स्कूल पाळधी येथील बालगोपालांनी गावातून प्रभात फेरी काढत, गावात गोपाला गोपाला देवकीनंदन गोपालाचा जयघोष केला. जीपीएस कॅम्पसच्या बालगोपालांनी संत गाडगे महाराजांची वेशभूषा परिधान करत, ज्याप्रमाणे गाडगे बाबा लोकांचा प्रबोधन करत होते त्याप्रमाणे पाळधीतील रहिवाशांचे अनोख्या पद्धतीने प्रबोधन केले.
टीम जीपीएसचा एकच संदेश, स्वच्छ ठेवा भारत देश, हातात मोबाईल घरात फोन, उघड्यावर शौचास बसतय कोण?, स्वच्छता पाळा रोगराई टाळा अशा अनोख्या घोषणांनी व गाडगे बाबांना आवडणाऱ्या गोपाला गोपाला देवकीनंदन गोपाला या सुंदर अशा भजनानी बालगोपालांनी सकाळ भक्तिमय व प्रबोधनमय केली.
महाराष्ट्राचे पाणीपुरवठा व स्वच्छता मंत्री गुलाबराव पाटील यांच्या असामान्य कर्तुत्वातून प्रेरणा घेत प्राचार्य सचिन पाटील यांनी सदर प्रभात फेरी आयोजित केली. स्वच्छता हा यशस्वी जीवनाचा मूलमंत्र आहे असे प्रतिपादन प्रतापराव पाटील यांनी विद्यार्थ्यांना मार्गदर्शन करताना केले. सदर कार्यक्रमाला भाऊसाहेब गुलाबराव पाटील इंग्लिश मीडियम स्कूलचे प्राचार्य सचिन पाटील सर व सर्व शिक्षक व शिक्षकेतर कर्मचारी यांचे सहकार्य लाभले.