मुंबई, लोकशाही न्यूज नेटवर्क:
मुंबई उच्च न्यायालयाने अखेर उद्धव ठाकरे गटाला मुंबईतील शिवाजी पार्कवर (शिवतीर्थावर) दसरा मेळावा घेण्यास परवानगी दिली आहे. न्यायालयाने शुक्रवारी आपला निकाल देताना म्हटले आहे की, महाराष्ट्र सरकारने उद्धव ठाकरे गटाला शिवाजी पार्कमध्ये २ ते ६ ऑक्टोबर दरम्यान सभा घेण्याची परवानगी द्यावी. न्यायालयाचा हा निर्णय शिवसेनेतील एकनाथ शिंदे गटाला मोठा धक्का मानला जात आहे. या खटल्याच्या सुनावणीदरम्यान शिवाजी पार्कवर दसरा मेळावा घेण्याची एकनाथ शिंदे यांची याचिका न्यायालयाने फेटाळून लावली आहे.
उच्च न्यायालयाच्या निर्णयापूर्वी, बीएमसीच्या वकिलांनी सर्वोच्च न्यायालयाच्या 2004 च्या आदेशाचा संदर्भ दिला होता, ज्यामध्ये असे नमूद केले होते की न्यायालयांनी कायदा आणि सुव्यवस्थेच्या बाबतीत हस्तक्षेप करू नये आणि प्रशासनाचे नियंत्रण असावे. हा निकाल देताना न्यायालयाने सांगितले की, ठाकरे गटाने ज्या दिवशी उच्च न्यायालयात धाव घेतली त्याच दिवशी बीएमसीने पोलिसांचा अहवाल मागवला. दोन्ही गटांना शिवाजी पार्कवर दसरा मेळावा घेऊ न देण्याचा बीएमसीचा निर्णय कोणत्याही प्रकारे समर्थनीय नाही, असेही न्यायालयाने म्हटले आहे.
शुक्रवारी या प्रकरणाच्या सुनावणीदरम्यान शिवसेनेच्या (ठाकरे गट) वतीने मुंबई उच्च न्यायालयात अधिवक्ता एसपी चिनॉय म्हणाले, “शिवसेना 1966 पासून शिवाजी पार्कवर दसरा मेळावा आयोजित करत आहे. केवळ कोरोनाच्या काळात दसरा मेळावा आयोजित केला जात नव्हता. कोविडनंतर आता सर्व सण साजरे केले जात आहेत, अशा परिस्थितीत शिवसेनेच्या वतीने 2022 मध्ये दसरा मेळावा आयोजित करण्यास परवानगी द्यावी.
