भोपाळ, लोकशाही न्यूज नेटवर्क
गेल्या काही महिन्यांपासून धीरेंद्र कृष्ण शास्त्री उर्फ बागेश्वर बाबा वादात भोवऱ्यात अडकले आहेत. त्यातच त्यांच्या अडचणी वाढल्या आहेत. बागेश्वर धाममध्ये एका महिलेचा मृत्यू झाला असून एक तरुणी गायब झाल्याचे वृत्त आहे.
मयत महिला उत्तर प्रदेशच्या फिरोजाबाद जिल्ह्यातील रहिवाशी असून एक महिन्यापासून ती पतीसोबत बागेश्वर धाममध्ये राहत होती. तिला किडनीचा आजार होता. उपचारासाठी ती बागेश्वर धाममध्ये आली होती. रुग्णालयात योग्य उपचार मिळाले नाहीत. त्यामुळे ही महिला बागेश्वर धाममध्ये आली होती. बागेश्वर धाममध्ये आल्यानंतर तिला बरं वाटू लागलं होतं. मात्र अचानक तिची तब्येत बिघडली. त्यामुळे तिचा मृत्यू झाला. बाबा धीरेंद्र कृष्ण शास्त्रींवर पत्नीची श्रद्धा होती. त्यामुळेच तिला बागेश्वर धाममध्ये आणण्यात आलं होतं, अशी माहिती महिलेच्या पतीने दिली आहे.
ही घटना ताजी असतानाच बागेश्वर धामच्या प्रेत दरबारातून एक तरुणी गायब झाली आहे. उत्तर प्रदेशच्या देवरिया जिल्ह्यातील देवकली जयराम येथील ही तरुणी आहे. नीरज मौर्या असं या मुलीचं नाव आहे. तिच्या वडिलांचं नाव ओमप्रकाश मोर्या असं आहे. गेल्या 12 फेब्रुवारी 2023पासून म्हणजे चार दिवसांपासून ही मुलगी गायब आहे. प्रेत दरबार बागेश्वर धाममधून आपली मुलगी गायब झाली आहे, असं या मुलीच्या वडिलाने सांगितलं. मुलीच्या बाबतीत कुणालाही माहिती मिळाल्यास तात्काळ तिची माहिती द्या, असं आवाहन या मुलीच्या वडिलांनी लोकांना केलं आहे.