नवी दिल्ली – पेट्रोल आणि डिझेलच्या किंमती कमी करणे केंद्र सरकारच्या हातात नाही असं म्हणणाऱ्या केंद्र सरकारने आज पेट्रोल-डिझेलच्या किंमतीत अडीच रुपयांची कपात करण्याची घोषणा केली आहे. केंद्र सरकारच्या घोषणेनंतर राज्य सरकारनेही अडीच रुपयांनी पेट्रोल-डिझेलच्या किंमती कमी करण्याचे ठरवल्याने महाराष्ट्रात पेट्रोल-डिझेलच्या किंमती पाच रुपयांनी स्वस्त होणार आहेत. सरकारच्या या निर्णयामुळे सर्वसामान्यांना मोठा दिलासा मिळणार आहे.
इंधनावरील एक्साईज ड्युटी १ रुपया ५० पैसे कमी होईल, तर ओएमसी म्हणजे तेल कंपन्यांकडून १ रुपयांची कपात करण्यात येईल. केंद्र सरकार आणि तेल कंपन्यांच्या कपातीमुळे ग्राहकांना पेट्रोल आणि डिझेल अडीच रुपयांनी स्वस्त होणार आहे. इतर राज्यांत पेट्रोल-डिझेल अडीच रुपयांनी स्वस्त होणार असले तरी महाराष्ट्रात मात्र पाच रुपयांनी स्वस्त होणार आहे. मुख्यमंत्री देवेंद्र फडणवीस यांनी ट्विट करून राज्य सरकार पेट्रोल-डिझेलच्या दरात अडीच रुपयांची कपात करणार असल्याचे म्हटले आहे. केंद्र व राज्य सरकारच्या घोषणेमुळे महाराष्ट्रात पेट्रोल आणि डिझेलच्या दर पाच रुपयांनी स्वस्त होणार आहेत. सरकारच्या या निर्णयामुळे सर्वसामांन्यांना मोठा दिलासा मिळणार आहे.
