पुणे;-पाच वर्षाच्या मुलीच्या शाळेतील ॲडमिशनच्या कारणावरून वाद विकोपाला जाऊन पत्नीने चक्क पतीच्या अंगावर रॉकेल ओतून त्याला ठार मारण्याचा प्रयत्न केल्याची धक्कादायक घटना येरवडा येथे घडली असून या प्रकारामुळे खळबळ उडाली आहे या घटनेत पती 50 टक्के भाजला गेला असून शेजाऱ्यांनी त्याला ससून रुग्णालयात उपचारासाठी दाखल केले आहे याप्रकरणी पोलिसांनी पत्नीला ताब्यात घेतले आहे .
मंगळवारी रात्रीच्या सुमारास ही घटना घडली.मुकेश सुरेश राजपूत (वय 42, रा. येरवडा) असे जखमी झालेल्याचे नाव आहे. याप्रकरणी पोलिसांनी पत्नी उज्वला दत्तात्रय कांबळे (वय 44) हिला अटक केली आहे. तर, तिच्या एका 55 वर्षीय नातेवाईकाविरोधात गुन्हा नोंद करण्यात आला आहे.
उज्वला ही जखमी मुकेश यांची दुसरी पत्नी आहे. या दोघांना पाच वर्षाची मुलगी आहे. या मुलीचा शाळेत प्रवेश घेण्यावरून आणि शाळेतील प्रवेश शुल्कावरून दोघांमध्ये मागील काही दिवसांपासून वाद होते. याच वादातून पत्नी उज्वलाने घरातून रॉकेलचा डब्बा आणला आणि पतीच्या अंगावर ओतला. त्यानंतर लायटरने त्यांना पेटवून दिले.
