अयोध्या, लोकशाही न्यूज नेटवर्क;
जानेवारी महिन्यात होणाऱ्या प्राणप्रतिष्ठा कार्यक्रमाच्या पार्श्वभूमीवर अयोध्येत राम मंदिर उभारणीचे काम वेगाने सुरू आहे. 22 जानेवारीला होणाऱ्या कार्यक्रमासाठी रात्रंदिवस मेहनत सुरू आहे. याआधी अयोध्या जंक्शनचे नाव बदलल्याची मोठी बातमी समोर आली आहे. अयोध्येतील भाजप खासदार लल्लू सिंह यांनी ही माहिती दिली आहे. या निर्णयाबद्दल त्यांनी पंतप्रधान मोदी, मुख्यमंत्री योगी आणि गृहमंत्री अमित शहा यांचे आभार मानले आहेत.
आता हे असेल नवीन नाव
अयोध्येतील भाजप खासदार लल्लू सिंह म्हणाले की, पंतप्रधान मोदींच्या मार्गदर्शनाखाली जनभावनेच्या अपेक्षेनुसार नव्याने बांधण्यात आलेल्या भव्य अयोध्या रेल्वे स्थानकाचे अयोध्या जंक्शनचे नाव बदलून ‘अयोध्या धाम जंक्शन’ करण्यात आले आहे. या निर्णयाबद्दल पूज्य संत, अयोध्यावासीय आणि अयोध्या भक्तांच्या वतीने त्यांनी पंतप्रधान नरेंद्र मोदी, उत्तर प्रदेशचे मुख्यमंत्री योगी आदित्यनाथ, गृहमंत्री अमित शहा, रेल्वे मंत्री अश्विनी वैष्णव यांचे मनःपूर्वक आभार मानले आहेत.
पीएम मोदी 30 डिसेंबरला पोहोचणार आहेत
पंतप्रधान मोदी 30 डिसेंबरला अयोध्येला जाणार आहेत. येथे ते पुनर्विकसित अयोध्या रेल्वे स्थानक आणि नवीन विमानतळाचे उद्घाटन करतील. 22 जानेवारी 2024 रोजी राम मंदिरात प्राणप्रतिष्ठा कार्यक्रमाचे आयोजन केले जाणार आहे ज्यात पंतप्रधान मोदी प्रमुख पाहुणे असतील. याशिवाय प्राणप्रतिष्ठा कार्यक्रमासाठी देशभरातील सेलिब्रिटी, राजकारणी आणि हजारो ऋषी-संतांनाही आमंत्रित करण्यात आले आहे.
पंतप्रधान मोदींसह हे असतील पाहुणे
22 जानेवारी 2024 रोजी अयोध्या राम मंदिरात होणाऱ्या प्राणप्रतिष्ठा कार्यक्रमाला पंतप्रधान मोदी प्रमुख पाहुणे म्हणून उपस्थित राहणार आहेत. पंतप्रधानांशिवाय कोणत्याही क्षेत्रात देशाचे नाव लौकिक मिळवून देणाऱ्या सर्व प्रमुख व्यक्तींनाही आमंत्रित करण्यात आले आहे. यासोबतच सुमारे चार हजार संतांना निमंत्रणे पाठवण्यात आली आहेत. सर्व शंकराचार्य, महामंडलेश्वर, शीख आणि बौद्ध पंथातील सर्वोच्च संतांना पाचारण करण्यात आले आहे. स्वामी नारायण, आर्ट ऑफ लिव्हिंग, गायत्री परिवार, शेतकरी, कलाविश्वातील मान्यवरांना आमंत्रित करण्यात आले आहे. कारसेवकांच्या कुटुंबीयांनाही निमंत्रणे पाठवण्यात आली आहेत.
