पारोळा, लोकशाही न्यूज नेटवर्क
मुलीच्या लग्नासाठी जमा केलेले सहा लाख रुपये चोरटयांनी लंपास केल्याची घटना पारोळा येथे घडली आहे. कुटुंब झोपलेले असतांना चोरट्यांनी मागच्या दरवाजाने घरात प्रवेश करत लोखंडी कोठीतील सहा लाखांची रोकड लंपास केल्याची घटना घडली.
याबाबत अधिक माहिती अशी की, पारोळा शहरातील पारोळा येथील राजीव नगर भागात नंदु रमण मिस्त्री हे वास्तव्यास आहेत. त्यांनी सहा लाखांची रक्कम आपल्या मुलीच्या लग्नासाठी जमा केली होती. ती रक्कमच चोरट्यांनी लंपास केल्याने त्यांना मोठा धक्का बसला आहे. राजीव गांधी नगरमधील मिस्त्री काम करणारे नंदू रमण मिस्त्री हे आपल्या कुटूंबासोबत १७ रोजी रात्री दहा वाजता झोपल्यानंतर त्यानंतर दुसऱ्या दिवशी त्यांच्या पत्नी सकाळी उठल्या असता त्यांना घराच्या पाठीमागील दरवाजा उघडा दिसला. त्यांनी घरात पाहणी केली असता घरातील लोखंडी कोठी दिसून न आल्याने त्यांनी आपल्या घरच्यांना सांगितले. त्यांनी या कोठीला कुलूप लावून मुलीच्या लग्नासाठी जमा केलेली सहा लाखांची रोकड ठेवली होती.
दरम्यान त्यांनी या कोठीची शोधाशोध केली असता ती घराच्या मागील बाजूस उघड्या जागेत पडलेली मिळून आली. चोरट्यांनी यातील सहा लाखांची रोख रक्कम लंपास केल्याचे उघड झाले आहे.
