पारोळा, लोकशाही न्यूज नेटवर्क;
पारोळा तालुक्यातील विचखेडा गावाजवळ झालेल्या अपघातात रत्नापिंप्री येथील १६ वर्षीय तरुणाचा जागीच मृत्यू झाला तर ४० वर्षीय व्यक्ती गंभीर जखमी झाल्याची घटना दि. १७ रोजच्या मध्य रात्री घडली.
याबाबत अधिक माहिती अशी की, रत्नापिंप्री येथील पांडुरंग मन्साराम पाटील (४०) व चेतन अरूण पाटील (१६) दोघे मोटार सायकल ने धुळ्याकडे जात असतांना पारोळा तालुक्यातील विचखेडा गावाजवळ अज्ञात भरधाव वेगात असलेल्या वाहनाने समोरून येणाऱ्या मोटरसायकला धडक दिल्याने दोघेही रस्त्यावर फेकले गेले त्यात चेतन पाटील हा जागीच ठार झाला. तर पांडुरंग पाटील हे गंभीर जखमी झाले. याबाबत प्रत्यक्षदर्शींनी पारोळा पोलिसांना याबाबत माहिती दिली. चेतन पाटील याला पारोळा येथे रुग्णालयात आणले असता डॉक्टरांनी तपासून त्यास मृत घोषित केले, तर पांडुरंग पाटील यांची प्रकृती चिंताजनक असल्याने धुळे रुग्णालयात उपचारासाठी पाठवण्यात आले.
मयत चेतन पाटील याच्या पश्चात आई, वडील, भाऊ असा परिवार आहे. चेतनच्या दुर्दैवी अपघाती मृत्यूमुळे रत्नापिंप्री, दबापिंप्री, होळपिंप्री या तिन्ही गावात शोककळा पसरली आहे. अवघ्या सोळा वर्षीय चेतनच्या मृत्यूने संपूर्ण गाव हळहळला दुपारी अत्यंत शोकाकुल वातावरणात त्याच्यावर अंत्यसंस्कार करण्यात आले. याबाबत पारोळा पोलिसात घटनेची नोंद करण्यात आली असून पुढील तपास पारोळा पोलिस करीत आहेत.
