पाचोरा, लोकशाही न्यूज नेटवर्क:
पाचोरा रेल्वेस्थानकावरुन धावणाऱ्या मंगला एक्स्प्रेस मधुन उतरण्याचा प्रयत्न करत असलेला तरुण धावत्या रेल्वेखाली आला. मंगला एक्स्प्रेसचे आठ डब्बे तरुणाच्या अंगावरुन निघुन गेले. मात्र सुदैवाने या घटनेत तरुण बचावला असुन या अपघातात तरुणाच्या डाव्या पायाची पाचही बोटे कापली गेली आहे.
याबाबत सविस्तर वृत्त असे की, राहुल जयंत भदाणे (२९) रा. पडासखेडे ता. पारोळा हा तरुण सांगली येथे खाजगी कामानिमित्त गेला होता. दरम्यान ४ आॅगस्ट रोजी राहुल याने मंगला एक्स्प्रेसमध्ये बसला. सायंकाळी ७ वाजेच्या सुमारास पाचोरा रेल्वेस्थानका नजीक मंगला एक्स्प्रेस धिम्या गतीने जात असतांना राहुल याने एक्सप्रेसमधुन उतरण्याचा प्रयत्न केला. त्याच वेळी राहुल याचा पाय घसरला व तो एक्स्प्रेसखाली सापडला. मंगला एक्स्प्रेसचे आठ डब्बे राहुल याचे अंगावरुन गेले. या अपघातात सुदैवाने राहुल भदाणे याचे प्राण वाचले असले तरी राहुल यास आपल्या डाव्या पायाची पाचही बोटे गमवावी लागली आहे.
घटनेची माहिती मिळताच लोहमार्ग पोलिस दुरक्षेत्रात पो. काॅ. विलास जाधव हे घटनास्थळी दाखल होवून घटनास्थळाचा पंचनामा करत रुग्णवाहिका चालक अमोल पाटील व दादु पाटील यांच्या मदतीने राहुल भदाणे यास पाचोरा ग्रामीण रुग्णालयात दाखल करण्यात आले असुन त्याचेवर उपचार सुरू आहेत. घटने प्रकरणी पाचोरा लोहमार्ग पोलिस दुरक्षेत्रात अपघाताची नोंद करण्यात आली असून घटनेचा पुढील तपास चाळीसगावचे पी. एस. आय. किसन राख यांच्या मार्गदर्शनाखाली पोलिस काॅन्स्टेबल विलास जाधव हे करीत आहे.