धक्कादायक; 8 महिन्यांच्या गरोदर सुनेच्या डोक्यात सासूने घातला वरवंटा; सुनेचा मृत्यू…

 

सहारनपूर, लोकशाही न्यूज नेटवर्क:

 

सहारनपूर जिल्ह्यातील बरगाव पोलीस स्टेशन हद्दीतील जदौदा पांडा गावात किरकोळ वादातून सासूने तिच्या गर्भवती सुनेच्या डोक्यावर वरवंट्याने वार केले, परिणामी तिचा मृत्यू झाला. पोलिसांनी शुक्रवारी सांगितले की, आरोपी सासूला अटक करण्यात आली आहे. पोलीस अधीक्षक (ग्रामीण) सागर जैन यांनी सांगितले की, 32 वर्षीय स्वातीचा विवाह बारगाव पोलीस ठाण्याच्या हद्दीतील जदौदा पांडा गावातील हरिओम याच्याशी दीड वर्षांपूर्वी झाला होता.

सासूचा जादूटोण्यावर विश्वास होता

बुधवारी संध्याकाळी हरिओमची आई रेखा आणि स्वाती यांच्यात काही कारणावरून वाद झाला, त्यानंतर रेखा (55) यांनी रागाच्या भरात स्वातीच्या डोक्यात वरवंटा मारला. या घटनेनंतर हरिओमने पत्नी स्वातीला स्थानिक रुग्णालयात नेले, जिथे डॉक्टरांनी तिला मेरठला रेफर केले. गुरुवारी रात्री उशिरा स्वातीचा उपचारादरम्यान मृत्यू झाल्याचे पोलिसांनी सांगितले. मृत स्वातीच्या नातेवाईकांनी सांगितले की स्वाती 8 महिन्यांची गरोदर होती आणि तिच्या सासूचा जादूटोण्यावर विश्वास होता, तिला तिने विरोध केला. घटनेच्या दिवशी याच मुद्द्यावरून दोघांमध्ये वाद झाला होता.

आई-वडिलांना सांगितले – सून जिन्यावरून पडली

जैन यांनी सांगितले की, या घटनेनंतर रेखा यांनी स्वातीच्या कुटुंबीयांना फोन करून सांगितले की स्वाती पायऱ्यांवरून खाली पडल्याने जखमी झाली असून तिला उपचारासाठी रुग्णालयात नेण्यात येत आहे. जैन यांनी सांगितले की, पोलिसांनी रेखाला अटक केली असून मृतदेह पोस्टमार्टमसाठी पाठवण्यात आला आहे.