जळगाव , लोकशाही न्यूज नेटवर्क
जळगाव जिल्हा सहकारी बँक अध्यक्ष व उपाध्यक्ष पदाची आज (शनिवार) निवड करण्यात आली. राष्ट्रवादीचे जिल्हाध्यक्ष रवींद्र पाटील यांची निवड होणार असल्याची जोरदार चर्चा राजकीय वर्तुळात होत असतांना राष्ट्रवादीचे संजय पवार यांची आज अध्यक्षपदी निवड करण्यात आली तर उपाध्यक्षपदी अमोल चिमणराव पाटील यांची निवड करण्यात आली .
यावेळी महाविकास आघाडी व शिवसेना शिंदे गट यांची संयुक्त सत्ता असून महाविकास आघाडीकडे अध्यक्षपद तर शिंदें गटाकडे उपाध्यक्ष पद निश्चित झाले.
जिल्हा सहकारी मध्यवर्ती बँकेचे अध्यक्ष तथा राष्ट्रवादीचे माजी आमदार गुलाबराव देवकर, उपाध्यक्ष श्यामकांत सोनवणे यांनी राजीनामा दिल्याने ही निवड झाली. आज सकाळी जिल्हा बँक चेअरमन पदासाठी राष्ट्रवादीचे रवींद्र भैय्या पाटील आणि संजय पवार या दोघांनी उमेदवारी अर्ज दाखल केले होते.
रवींद्र भैय्या यांना दहा तर संजय पवार यांना 11 मतं मिळाली. या निवडणुकीची सूत्र आमदार मंगेश चव्हाण यांच्याकडे होती. त्यांनी मंत्री गिरीश महाजन आणि पालकमंत्री गुलाबराव पाटील यांच्या मार्गदर्शनाखाली राजकीय खेळी करून संजय पवार यांना विजयी करण्यात मोठी भूमिका बजावली असल्याचे बोलले जात आहे.
