जळगाव
नवीन दुचाकी खरेदी केल्यानंतर देवदर्शनासाठी गेलेल्या मित्रांचा पाण्यात बुडून मृत्यू झाला आहे. प्रथमेश आणि रोहन अशी मृतांची नावे आहेत. ते दोघे सप्तशृंगी गडावर दर्शनासाठी गेले होते. तापी नदीत अंघोळीला गेले असताना दोघे जीवलग मित्र पाय घसरुन पडले. त्यांचा बुडून शेवट झाला.
शिरागड येथे तापी नदी परिसरात देवी दर्शनासाठी आल्यावर अंघोळीसाठी गेलेल्या दोन अल्पवयीन मुलांचा पाण्यात बुडून दुर्दैवी मृत्यू झाल्याची घटना घडली असून यावल पोलीस ठाण्यात नोंद करण्यात आली आहे. यावल तालुक्यातील शिरागड येथे तापी नदीच्या काठावर पंचक्रोशीतील प्रसिद्ध सप्तशृंगी देवीचे मंदिर असून या ठिकाणी दर्शनासाठी येणाऱ्या भक्तांची नेहमीच गर्दी असते. या मंदिरात दर्शनासाठी येणारे भाविक तापी नदीत अंघोळ करत असतात. दरम्यान सोमवारी दि. 15 एप्रिल रोजी दुपारीच्या वेळेस शिरागड येथे रोहन काशिनाथ श्रीखंडे (वय 17 रा. रामानंद नगर जळगाव) व प्रथमेश शरद सोनवणे (वय 17 राहणार वाघनगर जळगाव) हे दोघे दर्शनासाठी आले होते.
प्रथमेश आणि रोहन यांनी दुपारी एक वाजेला देवीचे दर्शन घेतले व त्यानंतर ते तापी नदीच्या पात्रात अंघोळ करण्यास गेले. दरम्यान दोन वाजेच्या सुमारास अचानक दोघे पाण्याचा अंदाज न आल्याने खोल पाण्यात बुडाले. तेव्हा तातडीने त्यांना तिथून नागरिकांच्या मदतीने बाहेर काढण्यात आले. यानंतर त्यांना यावल ग्रामीण रूग्णालयात उपचारासाठी आणण्यात आले. या ठिकाणी डॉ. प्रशांत जावळे यांनी तपासणी करून दोघांना मृत घोषित केले. या प्रकरणी यावल पोलीस ठाण्यात शरद शिवराम सोनवणे यांनी दिलेल्या माहितीवरुन अकस्मात मृत्यूची नोंद करण्यात आली असून घटनेचा पुढील तपास पोलीस निरीक्षक प्रदीप ठाकूर यांच्या मार्गदर्शनाखाली हवालदार सिकंदर तडवी, भरत कोळी करत आहेत. दरम्यान, या दोन मुलांच्या मृत्यूमुळे परिसरात हळहळ व्यक्त होत आहे.
प्रथमेशच्या वडिलांनी केला होता विरोध
प्रथमेश सोनवणे याचे वडील शेती काम करतात. त्याला एक मोठी विवाहित बहीण असून आई गृहिणी आहे. प्रथमेश हा बहिणीचा एकुलता एक भाऊ व सोनवणे कुटुंबाचा आधार होता. त्याच्या अकाली जाण्याने या कुटुंबाला मोठा धक्का बसला आहे. प्रथमेश हा शिरागड येथे जात असल्याचे समजल्यावर त्याला त्याच्या वडिलांनी रोखण्याचा प्रयत्न केला. पण प्रथमेशने त्यांचे ऐकले नाही.
नवीन दुचाकीचा आनंद टिकला नाही
रोहनने गुढीपाडव्याला नवीन दुचाकी घेतली. याच दुचाकीवरुन तो मित्र प्रथमेशला घेऊन दर्शनाला गेला. मात्र दोघेही पाण्यात बुडाले. त्यामुळे रोहनसाठी नवीन दुचाकीचा आनंद केवळ सहा दिवसच टिकला. रोहनच्या निधनामुळे कुटुंबाला मोठा धक्का बसला आहे. रोहन आणि प्रथमेशची अतिशय घट्ट मैत्री होती. ते नेहमी सोबत असायचे. आता दोघांनी सोबतच जगाचा निरोप घेतला. त्यामुळे हळहळ व्यक्त होत आहे.
