धुळे, लोकशाही न्यूज नेटवर्क:
धुळे जिल्ह्यातील साक्री रोडवरील महिंदळे शिवारातील बजरंग सोसायटीत काल रात्री अत्यंत दुर्दैवी घटना घडली. घरातील तारेवर ओले कपडे टाकत असतांना तारेत विद्युत प्रवाह असल्याने विजेचा शॉक लागून सुनेसह सासूचा मृत्यू झाला. याबाबत धुळे तालुका पोलिसात नोंद झाली आहे. या घटनेमुळे परिसरात शोककळा पसरली आहे. शोभाबाई कृष्णा झीने (39) व रुखमाबाई पांडुरंग झीने (65) रा.प्लॉट नं.54, बजरंग सोसायटी, महिंदळे शिवार, साक्री रोड, धुळे अशी मयत सुन व सासुचे नाव आहे.
याबाबत सविस्तर वृत्त असे कि, शोभाबाई ही काल दि.19 रोजी रात्री साडेआठ वाजेच्या सुमारास घरातील ओले कपडे तारेवर टाकत होती. पंरतू तारेत विद्युत प्रवाह असल्याने शोभाबाई हिस विजेचा झटका लागला. तेव्हा त्यांची सासू रुखमाबाई ही तेथेच जमिनीवर बसलेली असतांना शोभाबाई ही तारेसह रुखमाबाई यांच्या अंगावर पडल्या. त्यामुळे रुखमाबाई यांनाही विजेचा धक्का बसला. त्यात दोघींचा जागीच मृत्यू झाला. ही घटना कळताच परिसरातील नागरिकांनी तातडीने धाव घेत घरातील विज प्रवाह बंद करुन दोघींना बाजुला केले.
घटनेची माहिती मिळताच धुळे तालुका पोलिस ठाण्याचे निरीक्षक प्रमोद पाटील, उपनिरीक्षक राजश्री पाटील व कर्मचारी घटनास्थळी दाखल झाले होत. याबाबत धुळे तालुका पोलीस ठाण्यात अकस्मात मृत्यूची नोंद झाली असून तपास पोलीस उपनिरीक्षक राजश्री पाटील करीत आहेत.