पाचोरा, लोकशाही न्यूज नेटवर्क
हॉटेलमध्ये जेवणाच्या बिलावरून वाद विकोपास जाऊन मारहाण झाल्याची घटना ६ नोव्हेंबर रोजी पाचोरा तालुक्यातील सामनेर येथील एका हॉटेलवर घडली होती. दरम्यान या मारहाणीत एकास गंभीर दुखापत झाली असून जखमीची प्रकृती चिंताजनक आहे. याप्रकरणी जखमी व्यक्तीच्या वडिलांनी १० नोव्हेंबर रोजी पाचोरा पोलीस ठाण्यात दोन जणांवर गुन्हा नोंदवण्यात आला आहे.
पाचोरा तालुक्यातील सामनेर येथील पवनकुमार भागवत सूर्यवंशी (धोबी) व प्रमोद दिलीप पाटील हे ५ नोव्हेंबरला रात्री सामनेर गावानजीक असलेल्या एका हॉटेलमध्ये गेले होते. जेवण झाल्यानंतर हॉटेल चालक आणि पवनकुमार सूर्यवंशी व प्रमोद पाटील यांच्यात जेवणाच्या बिलावरुन शाब्दिक वाद झाला. त्यानंतर ६ नोव्हेबरला दुपारी दीड वाजेच्या सुमारास पवनकुमार सूर्यवंशी व प्रमोद पाटील हे जेवणाचे बिल देण्यास हॉटेलवर गेले होते.
यावेळी भांडणाचा बदला घेण्यासाठी पवनकुमार सूर्यवंशी व प्रमोद पाटील यांना बेदम मारहाण करण्यात आली. या मारहाणीत पवनकुमार यांच्या डोक्याला गंभीर दुखापत झाल्याने त्यास जळगाव जिल्हा रुग्णालयात दाखल केले होते. मात्र पवनकुमार यांची प्रकृती खालावत असल्याने त्यांना मुंबई येथील के. ई. एम. रुग्णालयात दाखल केले आहे. दरम्यान पवनकुमार यांची प्रकृती चिंताजनक असल्याचे समजते.
याप्रकरणी १० नोव्हेंबर रोजी पवनकुमार सूर्यवंशी यांचे वडिल भागवत सूर्यवंशी यांनी दिलेल्या फिर्यादीनुसार पाचोरा पोलिस ठाण्यात पाचोऱ्यातील हनुमान नगरमधील आर्यन मोरे (पूर्ण नाव माहित नाही) व सामनेर येथील गोकुळ नेरपगार या दोघांविरुद्ध गुन्हा दाखल करण्यात आला आहे.
