ठेका रद्द करण्यासाठी मुहूर्तच गवसेना : रुग्णवाहिका चालकांचा प्रश्न सुटेना
जळगाव ;- जिल्हा सामान्य रुग्णालयातील 102 रुग्णवाहिका ठेकेदार असलेल्या मुंबर्इ येथील राजछाया इनोवेटीव्ह सर्व्हिस कंपनीचा ठेका रद्द करण्याचा प्रस्ताव आयुक्तांकडे पाठविण्यात आला आहे. मात्र ठेका रद्द करण्याचा अधिकार हा सहसंचालकांचा असतांनाही तो आयुक्तांकडे का पाठविला? राज्यातील अन्य ठेके सहसंचालकांनी रद्द केले असतांना जळगावच्या ठेक्यासाठी आयुक्तच का? असा प्रश्न आता उपस्थित होत आहे.
चार महिन्यांपासून संबंधित ठेकेदार हा रुग्णवाहिका चालकांचे मानधन देत नसल्याने त्याच्या विरोधात चालकांनी बंड पुकारण्याचा इशारा दिल्यानंतरही शासकीय यंत्रणा अद्यापही ठोस कारवार्इ करीत नसल्याने ठेकेदाराला कुणीतरी पाठीशी घालत असल्याची शंका आहे. संबंधित ठेकेदार देखील काढता पाय घेण्याच्या तयारीत असतांना त्याचा बचाव अधिकारी कशासाठी करीत आहे; असा प्रश्न उपस्थित होत आहे. सहसंचालक डॉ. विजय बाविस्कर व डॉ. उमेश शिरोडकर यांनी कंपनीचा ठेका रद्द करण्याचा प्रस्ताव आयुक्तांकडे पाठविला असतांनाही त्यावर निवडणुकीचे कारण सांगत कारवार्इ करण्यात येत नाही.
सहसंचालकांचे अधिकार कात्रीत
राज्यातील अन्य ठेके हे सहसंचालकांच्या अखत्यारित रद्द करण्यात आले असतांना जळगावचा ठेका रद्द करण्यासाठी आयुक्तांच्या आदेश कशासाठी? आयुक्तांकडे निवडणुकीचा पदभार असल्याने ते ठेका रद्द करण्यासाठी तारीख पे तारीख देत आहे. मुळात हा अधिकार सहसंचालकांचा असतांनाही त्यांचा अधिकार कात्रीत का?
